काठमाडौं । राप्रपाका सांसद पशुपतिशमशेर जबराले आगामी आर्थिक वर्षको बजेटले मन्दीतर्फउन्मुख अर्थतन्त्रलाई सुधार्न नसक्ने बताएका छन् । 

आइतबार प्रतिनिधिसभा बैठकमा बजेटको संघीय मामिला तथा सामान्य प्रशासन मन्त्रालय, ऊर्जा, जलस्रोत तथा सिंचाई मन्त्रालय, अर्थ मन्त्रालय शीर्षकमाथिको छलफलमा भाग लिँदै उनले जीडीपीको वृद्धिदर सुस्त रहेको, मुद्रास्फिती उच्च रहेको र बेरोजगारी बढ्दो क्रममा रहेको अवस्थालाई मध्यनजर नगरी बजेट ल्याइएको बताए । 

सरकार र अन्तर्राष्ट्रिय साझेदारहरूले यसको प्रभावलाई कम गर्न उपायहरू सुझाइरहेको भए पनि त्यसअनुसार बजेट नआएको भन्दै उनले जनताको क्रयशक्ति धेरै घटेको बताए । आर्थिक मन्दीबाट देश कसरी बाहिर निकाल्ने भन्ने योजना बजेटमा नरहेको उनको भनाइ छ । 

“जम्मै जिडिपीको वृद्धिदर सुस्त छ । मुद्रास्फिती उच्च छ । बेरोजगारी बढ्दो छ । महत्त्वपूर्ण राजस्वमा चुनौतीहरू छन् । सरकार र अन्तर्राष्ट्रिय साझेदारहरुले यसको प्रभावलाई कम गर्न उपायहरु सुझाइ रहेका छन् । तर सुधार प्रक्रिया सुस्त छ । र संरचनात्मक समाधान गर्नु र आर्थिक वृद्धिको लचिलोपन सुधार गर्नुमा निर्भर हुनेछ,” उनले भने, “यसले मन्दीतर्फउन्मुख अर्थतन्त्रलाई सुधार्न सक्दैन । जनताको क्रयशक्ति स्वात्तै घटेको छ । सरकारले अहिलेको आर्थिकमन्दीलाई सम्बोधन गरेको देखिएन । आर्थिक मन्दीबाट देश कसरी बाहिर निकाल्ने केही पनि योजना छैन ।”