काठमाडौं । सत्तारुढ दल नेकपा (माओवादी केन्द्र)का सांसद देवेन्द्र पौडेलले पछिल्लो १५ वर्षमा केही पनि भएन भन्ने निराशा चिर्ने गरी बजेट आएको बताएका छन् । बजेट असहज स्थितिमा अर्थ प्रणालीलाई ट्रयाकमा ल्याउन र १५ वर्षमा बढ्दो निराशा सम्बोधन गर्नेगरी बजेट आएको दाबी उनको छ । उनले बजेट कार्यान्वयन बाहिर आशंका गरिएभन्दा फरक ढंगबाट कार्यान्वनयमा जान अनुरोध गरे । 

आइतबारको प्रतिनिधिसभाको बैठकमा आगार्मी आर्थिक वर्षको बजेटमाथिको सैद्धान्तिक छलफलमा बोल्दै उनले अब देशको समृद्धि सुशासन सामाजिक न्याय मौलिलक हक कार्यानवयन हुँदै समाजवादको बाटो हिँड्ने गरी बजेट आएको दाबी गरे ।  “पछिल्लो चार पाँच वर्ष बजेट लयमा हिँडेको थिएन । अहिलेको बजेट त्यसलाई लयमा हिँडाउने गरी आएको छ,” उनले भने ।

२० खर्बको आसपास बजेट आउँदा बजेटले गति लिन्छ भन्ने लागे पनि अर्थमन्त्रीले १८ खर्बमै बजेट रोक्नु उपलब्धि भएको उल्लेख गरे । दुई खर्ब वैदेशिक र आन्तरिक ऋणबाट तीन खर्ब ऋण जुटाउने भनि किटान गरी ल्याएको बजेट कार्यान्वयनको बाटोमा हिँड्ने विश्वास व्यक्त गरे । 

बजेट बनाउँदा अहिलेको चित्र हेरेर खुम्चिएर अघि बढ्ने भए केही पनि गर्न नसकिने उनको भनाइ छ । समस्याका बाबजुद बजेटले लिएको लक्ष्य सकारात्मक भएको उनको दाबी छ । बजेटमा ल्याइएको नाराले पनि सकारात्मक भूमिका खेलेको उनको भनाइ छ । 

“हामी अध्यारोमा हराएका थियौं, विभिन्न क्षेत्रहरूमा गोरेटो भेटिएको छ,” उनले थपे । उनले आर्थिक रूपमा विकराल बनेको स्थितिमा ६ प्रतिशतको आर्थिक वृद्धिदर लिनु भनेको तुलनात्मक रूपमा सन्तुलित भएको टिप्पणी गरे । 

उनले पुराना योजना, बीचमा अल्झिएका योजना र भवनहरू हेरेर सम्पन्न गर्ने बाटोमा अघि बढ्न अर्थमन्त्रीको ध्यानाकर्षण गराए । भएका योजनाहरू बेवारिसे अवस्थामा नछोड्न र अल्झिएर बसेका योजनाहरूको लगानी डुब्ने वातावरण नबनाउन पनि अनुरोध गरे ।