काठमाडौं । नेपालमा विद्युतीय गाडी (ईभी)को प्रयोग आक्रामक तरिकाले बढ्दै गएको छ ।

विगतका वर्षहरुको तुलनामा चालु आर्थिक वर्षको फागुन महिनासम्म तेब्बरबढी ईभी आयात भएका छन् । नेपाल आयत हुने गरेका आधाभन्दा बढी ईभी चीनबाटै आयात हुने गरेका छन् ।

हुनत चीन विश्वकै ठूलो ईभी निर्माता पनि हो । हाल विश्व बजारमा ६० प्रतिशत भन्दा लिथियम आयन ब्याट्री उत्पादन गर्नेमा चीन छ ।  दोस्रोमा जर्मनी र तेस्रोमा मात्रै अमेरिका छ । नेपालमा चीनबाट ईभी धेरै भित्रिने मात्र नभएर चिनियाँ ईभी ब्रान्डकै उपस्थित अन्य मूलुकको भन्दा बढी छ ।

कुन–कुन चिनियाँ ईभी ब्रान्ड छन् नेपालमा ?

नेपालमा सबैभन्दा बलियो उपस्थिति बनाएको चिनियाँ ईभी ब्रान्डमा बीवाईडी पर्छ ।  बीवाईडीलाई साइमेक्स इंकले नेपाल भित्र्याएको हो । बीवाईडीका चार मोडल हाल नेपालमा उपलब्ध छन् । सीजी मोटर्सले नेपाल भित्र्याएको नेटा, केवाईसी चेङगेङ र किङ लङ पनि चिनियाँ ईभी ब्रान्ड हुन् । 

चिनियाँ अटोनिर्माता जीएसीको ईभी ब्रान्ड आयोनसमेत सीजी मोटर्सले नेपाल भित्र्याएको छ ।

यस्तै चिनियाँ अटो ब्रान्ड चेरीको ईभी सबब्रान्ड ओमोडा पनि एसपीजी अटोमोबाइल्सले नेपाल भित्र्याएको छ । चिनियाँ वुलिङ ब्रान्डको बजेटमैत्री ईभी गाडीहरु पनि नेपालमा उपलब्ध छन् । ईभी नेपाल मोटर्सले यो ब्रान्ड नेपाल भित्र्याएको हो ।

नेपालमा उपलब्ध यी चिनियाँ ईभी ब्रान्डको बजार विस्तार भइरहँदा नयाँ ब्रान्ड भित्रिनेक्रम पनि जारी छ ।

कुन वर्ष कति भित्रिए चीनबाट गाडी ?

चालु आर्थिक वर्ष २०८०/०८१ को फागुन मसान्तसम्म नेपालमा ६ हजार ४३५ विद्युतीय गाडी भित्रिएका छन् । यसको आधा भन्दा बढी ३ हजार ९६९ गाडी चीनबाट आयात भएको छ ।

चीनबाट आयातित १० अर्ब ८६ करोड ४ लाख ५३ हजार रुपैयाँका गाडीबाट सरकारले ५ अर्ब २० करोड २८ लाख ८६ हजार रुपैयाँ राजस्व संकलन गरेको छ । गत आर्थिक वर्ष २०७९/०८० मा कुल ४ हजार ५० विद्युतीय गाडी नेपाल भित्रिएका थिए । यीमध्ये १ हजार ३७१ गाडी चीनबाट आयात भएको छ ।

४ अर्ब ११ करोड ३६ लाख १९ हजार आयात मूल्यका गाडीबाट सरकारले १ अर्ब १८ करोड ७७ लाख २२ हजार रुपैयाँ राजस्व संकलन गरेको थियो । आर्थिक वर्ष २०७८/०७९ मा १ हजार ८०७ ईभी आयात भएका थिए । यीमध्ये ८२३ गाडी चीनबाट आयात भएका थिए ।

२ अर्ब ४५ करोड १ लाख ३० हजार आयात मूल्य भएका ती गाडीबाट सरकारले ७० करोड ७८ लाख ९५ हजार रुपैयाँ राजस्व संकलन गरेको थियो । आर्थिक वर्ष २०७७/०७८ मा २४९ ईभी आयात भएका थिए । चीनबाट १४० गाडी भित्रिएका थिए ।

२६ करोड ६७ लाख ८७ हजार आयात मूल्यका ती गाडीबाट सरकारले १७ करोड ९९ लाख ९९ हजार रुपैयाँ राजस्व संकलन गरेको थियो । आर्थिक वर्ष २०७६/०७७ मा कुल ५७५ गाडी आयात भएका थिए । जसमा चीनबाट २३६ ईभी भित्रिएका थिए ।

ती गाडीको आयात मूल्य ६७ करोड ४० लाख ६१ हजार थियो भने सरकराले १६ करोड ३० लाख ३५ हजार रुपैयाँ राजस्व संकलन गरेको थियो ।