काठमाडौं । संस्कृति, पर्यटन तथा नागरिक उडड्यनमन्त्री हितबहादुर तामाङले नेपाल वायुसेवा निगमभित्रको आर्थिक अनियमितता, भ्रष्टाचार र पक्षपात अन्त्य गर्न मन्त्रालय दृढ रहेको बताएका छन् ।

मंगलबार प्रतिनिधिसभा बैठकमा सांसदहरूले सोधेका प्रश्नको जवाफ दिने क्रममा उनले यस्तो बताएका हुन् । सांसद प्रेम सुवालले नेपाल वायुसेवा निगमभित्रको आर्थिक अनियममिता, भ्रष्टाचार र पक्षपात अन्त्य नगरी व्यवस्थापन करार गर्न खोज्नु सरकारले आफ्नो असक्षमता होइन ? प्रश्न भन्दै प्रश्न गरेका थिए । 

यसको जवाफ दिँदै मन्त्री तामाङले भने, “व्यवस्थापन करार भनेको बिक्री होइन । मन्त्रालयले निगमको सारभूत परिवर्तनका लागि नागरिक उड्डयनको क्षेत्रमा प्रचलित असल अभ्यास प्रयोग गरेर अघि बढ्न चाहेको हो । निर्णयमा पुग्नुअघि व्यापक छलफल हुने नै छ ।” उनले निगम सम्बन्धमा मन्त्रायलबाट चालिने हरेक निर्णय पारदर्शी र राष्ट्रियहितमा हुने बताए । ढाकछोप गर्ने कुनै कुरा नभएको उनले बताए ।

यस्तै, सांसद् सुवालले दुर्गमको हवाई टिकटमा कालोबजारी हुनु गरेको भन्दै जवाफ मागेका थिए । मन्त्री तामाङले जवाफमा हवाई टिकटमा कालोबजारी हुनुहुँदैन भन्ने मन्त्रालयको स्पष्ट र निर्देशन पनि दिएको बताए । “हवाई टिकटमा कालोबजारी हुनुहुँदैन भन्ने मन्त्रालयको स्पष्ट र निर्देशन छ । कालोबजारी भएको बारेमा मन्त्रालयमा कुनै पनि उजुरी र सूचना आएको छैन,” उनले भने ।