काठमाडौं । राज्य व्यवस्था तथा सुशासन समितिका सभापति रामहरि खतिवडाले अख्तियार दुरुपयोग अनुसन्धान आयोगलाई ‘श्री ६’ बनाउने गरी कानुन बनाउन नसकिने बताएका छन् ।

मंगलबार समितिको बैठकपछि सञ्चारकर्मीहरूसँग बैठकबारे जानकारी दिँदै उनले अख्तियारसम्बन्धी विधेयक व्यापक छलफल गरेरमात्र समितिले अघि बढाउने बताए । उनले अख्तियारलाई निजी क्षेत्रमा पस्न दिने कि नदिने, नीतिगत निर्णयमा पस्न दिने कि नदिने जस्ता विषय जटिल भएको बताए ।

“अख्तियार प्राइभेट सेक्टरमा पनि जान खोजेको छ । यसको अर्थ बैंक, हस्पिटल, बिमालगायत क्षेत्रमा गएर काम गर्न खोजेको छ,” उनले भने, “राजाको पालामा श्री ५ हुँदा सबै ठाउँमा हात हाल्ने पद्धति थियो । अख्तियारलाई श्री ६ बनाउन थालियो भने प्रधानमन्त्रीले गरेको काम पनि अख्तियारले हेरेर कहिले २२ त कहिले २४ बुँदे जारी हुन थाल्छ।”

उनले अख्तियारको कार्यशैली पनि चित्तबुझ्दो नभएको बताए । अख्तियारमा बेनामे उजुरी आउँदा समस्या पर्ने गरेको, मुद्दा दर्ता कम भएको र सफलता दर पनि निराशाजनक रहेको उनको भनाइ छ ।

सभपाति खतिवडाले अख्तियारलाई कमजोर बनाउन नभएर आफ्नो बाटोमा ठिक ठाउँमा हिँडाउने गरी कानुन बनाइने बताए । यसका लागि सरोकारवाला सबैसँग छलफल गरिने उनको भनाइ छ ।

समितिको मंगलबार बसेको बैठकले अनुगमन विधेयक प्रतिवेदनसहित पारित गरेको छ । यो विधेयकपछि समितिले संवैधानिक परिषद्‌सम्बन्धी विधेयक, भ्रष्टाचार निवारणसम्बन्धी विधेयकलगायतलाई अघि बढाउने जानकारी दिए ।

खतिवडाले संवैधानिक परिषद्को काम, कर्तव्य र अधिकारसम्बन्धी विधेयक पनि अन्तिम चरणमा पुर्‍याएको भन्दै अध्यक्ष र बहुमत सदस्य कि अध्यक्षबाहेकको बहुमत सदस्य भन्ने कुरा मिलाउन शीर्ष नेतासँग संवाद भइरहेको बताए । यो विषय प्रमुख प्रतिपक्षी दल एमालेले अड्काएर राखिरहे आफूहरू लोकतान्त्रिक प्रक्रियामा गएर बहुमतबाट निर्णय गर्ने र विधेयक फुल हाउसमा लग्ने तयारीमा रहेको भनाइ खतिवडाको छ ।