काठमाडौं । नेपाल समाजवादी पार्टीका अध्यक्ष डा. बाबुराम भट्टराईले राजतन्त्र ‘राँकेभूत’ मात्र भएको भन्दै त्योसँग डराउनु नपर्ने बताएका छन् ।

सोमबार राष्ट्रिय मेलमिलाप दिवसका अवसरमा नेपाली कांग्रेसले काठमाडौंमा गरेको कार्यक्रममा डा. भट्टराईले जनतामा देखिएको असन्तुष्टि भने तत्काल सम्बोधन गर्नुपर्नेमा जोड दिए ।

“राजतन्त्रको मुद्दा फस्फोरसबाट ह्वार्र आगो देखाएर राँकेभूत भनेजस्तो मात्र हो,” डा. भट्टराईले भने, “राजतन्त्र अब फर्किंदैन । तर, जनतामा देखिएको असन्तुष्टि मुख्य चिन्ताको विषय हो । सरकार ६ महिना, वर्ष दिनमा परिवर्तन हुने कुरा सम्बोधन गर्न आवश्यक छ । जनताको अवस्थामा सुधार हुन नसक्ने कुरातर्फ सबै दलले चिन्ताको विषय बनाउन आवश्यक छ ।”

उनले भारतसँगको सम्बन्धलाई लिएर राष्ट्रवादी बन्ने राजनीति पनि बन्द गर्नुपर्ने बताए ।

“भारत हाम्रो छिमेकी मित्र हो । उससँगको सम्बन्धमा कडा टिप्पणी गरेर राष्ट्रवादी बन्ने राजनीति बन्द गर्नुपर्छ,” उनले भने, “बीपीलाई हामीले राष्ट्रघाती दलाल भनेका होइनौँ ? आखिरमा सबैभन्दा राष्ट्रवादी त उहाँ नै हुनुहुँदो रहेछ । आज गुणगान गाएर हुन्छ र ?”

बीपी कोइरालालाई जस्तै विगतमा पुष्पलाललाई पनि दलाल भनिएको भन्दै उनले त्यसले भन्नेहरूलाई नै पश्चात्ताप भएको बताए ।