काठमाडौं । प्रमुख प्रतिपक्ष दल नेकपा (एमाले)का सांसद राजेन्द्र राईले उपप्रधान एवं गृहमन्त्री नारायणकाजी श्रेष्ठको राजीनामा मागेका छन् । प्रतिनिधिसभाअन्तर्गतको राज्यव्यवस्था तथा सुशासन समितिको सोमबारको बैठकमा उनले ‘सुशासन दिन नसक्ने अनि मान्छे मार्ने ?’ भन्दै प्रश्न गरे ।

“तपाईं शालीन हुनुहुन्छ । अब यसो गर्नुस्, राजीनामा दिनुस्,” सांसद राईले भने, “युवाले रोजगारी माग्दा ताकीताकी गोली हान्नुहुन्छ भने किन राजीनामा नदिने ? ठाउँको ठाउँ गोली हानेर भकाभक मार्न पाइन्छ ?”

उनले सरकार र प्रहरीको कार्यशैलीप्रति प्रश्न गरे । घटनापछि मन्त्रीले नैतिकता देखाउन सक्नुपर्नेमा उनले जोड दिए ।

“तपाईंले मुलुक चलाउन सक्नु भएन, तपाईंले सुशासन दिन नसक्ने अनि मान्छे मार्ने ? शालीन व्यक्ति भन्नेले गोली हान्ने ? तपाईंको प्रहरीको कार्यशैली यही हो ? साधनस्रोत छैन भनेर मान्छे मार्ने ? नैतिकता देखाउनुभयो भने लोकले पनि राम्रो हुन्छ,” उनले भने । 

सांसद राईले माथिल्लो तहका कर्मचारीलाई पनि कारबाहीको दायरामा ल्याउनुपर्ने माग गरे । “सचिव, आईजीपीलाई कारबाही गर्नुस् न, तलको एउटा पीएसओलाई मात्र कारबाही गर्ने ? सीडीओलाई मात्र कारबाही ? तपाईं राजीनामा दिनुस्,” उनले भने, “हामी मान्दैनौँ, राजीनामा दिनुस् ।”

गएको शुक्रबार ललितपुरको बालकुमारीमा तनावपछि प्रहरीले गोली चलाएको थियो । घटनामा दुई युवकको मृत्यु भएको थियो । प्रदर्शनकारीले भौतिक पूर्वाधार तथा यातायातमन्त्री प्रकाश ज्वाला सवार गाडीमा आगजनी गरेका थिए ।

गृहमन्त्रीको जिज्ञासा– मन्त्री किन त्यो बाटोबाट आउनुभयो होला ?