काठमाडौं । अन्तरव्यवस्थापिका संघ (आईपीयू)को १४७औँ महासभा अफ्रिकी मुलुक एंगोलाको राजधानी लुवान्डामा सुरु भएको छ । ‘शान्ति, न्याय र सशक्त निकायका लागि संसदीय सक्रियता’ भन्ने नाराका साथ सुरु महासभा कात्तिक ६ देखि १० गतेसम्म सञ्चालन हुनेछ ।
महासभाको उद्घाटन समारोहमा गणतन्त्र एंगोलाका राष्ट्रपति जोआओ म्यानुएल गोनकालबे ल्युरेसन्स, आईपियूका महासचिव डुराकल पाचेको, संयुक्त राष्ट्रसंघका विशेष प्रतिनिधि डुराटे पाचेकालगायत व्यक्तिले सम्बोधन गरे ।
महासभामा नेपालका तर्फबाट राष्ट्रियसभा अध्यक्ष गणेशप्रसाद तिमिल्सिनाको नेतृत्वमा नौ सदस्यीय संसदीय प्रतिनिधिमण्डलले सहभागिता जनाएको छ ।
महासभामा राष्ट्रियसभा सदस्य कुमार दसौँदी र जीतेन्द्रनारायण देव तथा प्रतिनिधिसभा सदस्य रूपा सोसी चौधरी र सन्तोष परियार र संघीय संसद्का महासचिव डा. भरतराज गौतमलगायत अधिकारी सहभागी छन् । महासभामा अध्यक्ष तिमिल्सिनाले नेपालको संघीय संसद्का तर्फबाट सम्बोधन गर्ने कार्यक्रम छ । रासस
