काठमाडौं । माथिल्लो अरुण जलविद्युत् आयोजना बनाउन विश्व बैंकले एक खर्ब ३० अर्ब रुपैयाँ सहुलियतपूर्ण ऋण उपलब्ध गराउने भएको छ । विश्व बैंक र आईएमएफको संयुक्त वार्षिक बैठकमा सहभागी भएर आइतबार स्वदेश फर्किएका अर्थमन्त्री डा. प्रकाशशरण महतले यस्तो जानकारी गराएका हुन् ।

माथिल्लो अरुण जलविद्युत् आयोजनामा एक खर्ब ३० अर्ब रुपैयाँ सहुलियतपूर्ण ऋण सहायता दिन विश्व बैंक सकारात्मक भएको उनले बताए । विश्व बैंकका क्षेत्रीय उपाध्यक्ष मार्टिन रेजर र विकास वित्ततर्फका आकिहिको निसिओसँगको छलफलमा माथिल्लो अरुणमा एक खर्ब ३० अर्ब रुपैयाँसम्म सहुलियतपूर्ण ऋण उपलब्ध गराउने प्रतिबद्धता जाहेर भएको उनले बताए ।

उनले अमेरिकी डलर ३०० मिलियन अर्थात् ३९ अर्ब रुपैयाँबराबरको बजेटरी सहायता चालु आर्थिक वर्षभित्र परिचालन गर्ने गरी तयारी गर्न दुवै पक्ष सहमत भएको जानकारी दिए ।

उनले कोरियाका उपप्रधान एवं अर्थमन्त्री चु क्युङ होसँगको भेटमा कोरियन कम्पनीलाई नेपालमा लगानी गरी लाभान्वित हुन आग्रह गरेको बताए । नेपाली वायुसेवालाई कोरियामा सिधा उडान गर्न दिन चु क्युङसँग आग्रह गरेको उनले जानकारी दिए । भ्रमण फलदायी भएको उनको भनाइ छ ।