पोखरा । राष्ट्रिय स्वतन्त्र पार्टी (रास्वपा)का पूर्वसांसद डा. ढाकाकुमार श्रेष्ठले आफूलाई मन्त्री बनाउनका लागि भन्दै केन्द्रीय सदस्य मोहनजंग थापाले तीन करोड रकम मागेको खुलाएका छन् । 

समानुपातिकबाट सांसद बनेका श्रेष्ठले मेडिकल व्यवसायी दुर्गा प्रसाईंसँग दुई करोड रुपियाँ रकम मागेको अडियो सार्वजनिक भएको थियो । सोही अडियोका कारण उनलाई पार्टीले साधारण सदस्यसमेत नरहने गरी कारबाही गरेको थियो ।

श्रेष्ठले आफू मन्त्री लागेको तर त्यसका लागि 'कोर टिम'का लागि दुई करोड चाहिने बताउँदै श्रेष्ठले प्रसाईंसँग कुराकानी गरेको अडियो संवादमा खुलेको थियो । सोही 'कोर टिम'का सदस्यमध्येका एक मोहनजंग थापाले नै आफूसँग तीन करोड रुपियाँ मागेको श्रेष्ठको दाबी छ । 

स्पेस फोर के टेलिभिजनसँगको संवादमा बोल्दै श्रेष्ठले तीन करोड मागिए पनि साढे दुई करोडमा डिल भएको खुलाएका छन् ।

प्रसाईंसँगको अडियोबारे उनले भनेका छन्, “अझै पनि त्यो अडियोको वास्तविकता के हो भन्ने कसैलाई थाहा छैन । म पोखराको मान्छे, मुग्लिन गएर बसेँ, अनि एकछिनपछि पोखरा गएँ भनेर भन्दाखेरि कसैले त्यो अडियोलाई काटेर म मुग्लिङ गएर बसेँ मात्र राखेर अनि म पोखरा गएँ भन्ने काट्यो भने म त मुग्लिङ बसेको हुन्छ नि ।”

प्रसाईंसँग एकपटक कुराकानी भएको र त्यसक्रममा आफूले मेडिकल क्षेत्रको मान्छे भएकाले सहयोगका लागि आग्रह गरेको बताएका छन् । प्रसाईंले नै सुनियोजितरूपमा अडियो सार्वजनिक गरेको आरोप उनको छ ।

“एकपटक कुरा भएको थियो, दुर्गाजी केही परे सहयोग गर्नुपर्छ है, मेडिकल फिल्डको मान्छे भनेर केही समयअगाडि कुरा गरेको थिएँ । तर, उहाँले सुनियोजित तरिकाले उपचुनावको बेलामा ल्याएर मलाई वाट्सएपमा फोन गर्नुभयो र सहयोगको कुरा गर्नुभयो । मन्त्री बन्दै हुनुहुँदोरहेछ, तपाईंलाई मैले सहयोग गर्नुपर्‍यो के भन्नुहोस्,” श्रेष्ठले भने ।

उनका अनुसार प्रसाईं आफैँले सहयोगको कुरा अगाडि बढाएका हुन् । मन्त्री बन्ने कन्फर्म भइसकेको भन्दै मोहनजंग थापालगायतको टिमले तारन्तार फोन गरेपछि आफू रकम व्यवस्थापनमा लागेको र सोही क्रममा फिर्ता दिने गरी प्रसाईंसँग कुरा भएको उनको प्रष्टोक्ति छ ।

तर, सुनियोजित तरिकाले पूरै संवाद बाहिर नल्याइएको दाबी उनले गरेका छन् । “पैसाको कुरा चल्यो, त्यतिखेर मलाई पैसा चाहिएको पनि थियो । तर, २–२ करोड माग्ने हो भने त फर्काउनु पनि पर्‍यो नि त,” श्रेष्ठले भने, “दुर्गा प्रसाईं मेरो दाइ होइन, बा होइन, त्यसै मलाई पैसा त दिनुहुन्न । फर्काउने सर्तमा कुरा भएको थियो, अडियोमा त्यो फर्काउने सर्त छैन ।”

मन्त्री बाँडफाँटको बेलादेखि नै थापाले आफूलाई 'तपाईं मन्त्री बन्दै हुनुहुन्छ' भनेको र रकम पनि त्यही उपक्रममा मागिएको उनले खुलाएका छन् । 

“किन माग्नुभयो, थाहा भएन । मलाई चाहिँ तपाईं दौरा सुरुवाल लगाएर तयार हुनुहोस्, म्याडमलाई बोलाउनुहोस्, आफन्तहरूलाई बोलाउनुहोस्, भोलि मन्त्रीको शपथ हुनेवाला छ । तपाईं रेडी हुनुहोस्, ढुक्क हुनुहोस्, तपाईं मन्त्री बनिसक्नुभयो । तर, त्यसका लागि हामीलाई तीन करोड चाहिन्छ, पार्टीलाई सहयोग चाहिन्छ भनेर उहाँले माग्नुभयो,” श्रेष्ठले भने ।

मोहनजंग थापासँग कुरा भइसकेपछि उनले खटाएको मान्छेसँग साढे दुई करोडमा डिल भएको उनको भनाइ छ ।

मोहनजंग थापाले पैसा मागिसकेपछि नै आफू पैसा जुटाउनतिर लागेको उनले स्वीकार गरेका छन् ।

उनले भने, “त्यसपछि म त एक किसिमले मन्त्री बन्ने भएँ भन्ने सोच भयो । ४०–५० लाख मसँग थियो र अरू थप मलाई चाहियो ।”

रवि लामिछानेको 'कोर टिम' भनेर सार्वजनिक गरिएको अडियोमध्येमा एकजना मोहनजंग थापा नै रहेको उनले बताए ।

"घण्टाघण्टामा फोन आउँथ्यो, पैसा रेडी पार्नुभयो, खै चेक ल्याइदेको, नभए तपाईंको मन्त्री हुँदैन अर्को मान्छेलाई दिने हो भने," श्रेष्ठको भनाइ छ । 

सामाखुसीभित्रको कफी सपमा थापासँग भेट भएको उनले खुलाएका छन् । उनका अनुसार त्यही भेटमा मोहनले भेटाएका मान्छेसँग नै श्रेष्ठले रकमको 'डिल' गरेका थिए । 

आफूलाई मात्र कारबाही भएकाले अरूको प्रमाण पनि सार्वजनिक गरिदिने उनले चेतावनी दिएका छन् । 

“म सँग प्रमाण छ, केही समयमा निकाल्छु,” उनले भने ।