काठमाडौं । नेपाल वायुसेवा निगम (नेपाल एयरलाइन्स)को जहाज ग्राउन्डेड भएको ६४ दिन पुगेको छ ।

इन्जिनमा समस्या आएपछि निगमको न्यारोबडी नाइनएन–एकेएक्स लुम्बिनी जहाज ग्राउन्डेड भएको हो । उक्त जहाज जुन २० मा ग्राउन्डेड भएको थियो ।

निगमले जुलाई १८ र १९ मा जहाजको इन्जिन मर्मत तथा लिजको लागि फरक फरक सूचना जारी गरेको थियो । उक्त सूचनामा कुनै कम्पनीले पनि चासो नदिएपछि पुनः जहाज इन्जिन मर्मत र लिजको लागि टेन्डर आह्वान गरेको थियो ।

निगमले जुलाई २२ मा जहाजको इन्जिन मर्मत र लिजको लागि पुनः टेन्डर आह्वान गर्‍यो । उक्त टेन्डरको हालसम्म टुंगो लाग्न सकेको छैन । उक्त टेन्डर प्रक्रिया अगष्ट अन्तिमसम्म निर्णय हुने प्रवक्ता रमेश पौडेलले जानकारी दिए ।

इन्जिन मर्मतको लागि एक हप्ता भित्रै दिल्ली पठाउने तयारी भइरहेको प्रवक्ता पौडेलले जानकारी दिए ।

“जहाजको मर्मतको कामका लागि अन्तिम प्रक्रियामा छ । हामीले अगष्ट अन्तिम सातासम्ममा जहाज मर्मतको लागि दिल्ली पठाउछौँ,” प्रवक्ता पौडेलले भने, “सेप्टेम्बर पहिलो साता जहाज मर्मत भएरपनि उडानमा आउँछ ।”