काठमाडौं । प्रस्तावित प्रधानन्यायाधीश विश्वम्भरप्रसाद श्रेष्ठविरुद्ध उजुरी दिएका अधिवक्ता शान्तिकुमार (एसके) तिमल्सिनाले नियुक्ति प्रक्रिया सही नभएको बताएका छन् । सोमबार संसदीय सुनुवाइ समितिको बैठकमा उपस्थित उनले सो निर्णय गैरकानुनी भएको जिकिर गरे ।

तर, श्रेष्ठविरुद्ध आफ्नो उजुरी नरहेको उनले स्पष्ट पारे । संवैधानिक परिषद्ले विधि र प्रक्रिया मिचेको उनको भनाइ छ ।

“यो निर्णय गैरकानुनी हो । नियुक्ति प्रक्रिया सही भएन,” उनले भने, “उहाँ नियुक्त हुनु भएन भनेको छैन ।”

संवैधानिक परिषद्ले काम गर्न कानुनी रिक्तता रहेको उनले बताए । “मैले ११ पाना निवेदनमा लेखेको छु । संवैधानिक परिषद्ले काम गर्न कानुनी रिक्तता छ । यससम्बन्धी ऐन संसद्मा दर्ता छ, विचाराधीन छ,” उनले भने, “यो अवस्थामा प्रधानन्यायधीश कसरी नियुक्त हुन्छ ?”

आफूले व्यक्तिको विरोध नगरेको उनले उल्लेख गरे । “व्यक्तिका विषयमा मेरो चिनचान, लेनदेन केही छेन । उजुरीमा उहाँबारे कतै मैले लेखेको छैन,” उनले भने, “कानुन किन पालना हुँदैन ?” 

राज्यले गर्ने हरेक काम कानुनानुसार हुनुपर्नेमा उनले जोड दिए । “व्यक्ति स्वेच्छाचारी हुनु हुँदैन । लोकतन्त्रमा विश्वास गर्ने भए कानुन, नियमबमोजिम काम गर्नुपर्छ,” उनले भने ।

उनले समितिमा आफू विधिको कुरा गर्न आएको बताए । “यसरी नियुक्त भएको प्रन्याप्रति, कानुनप्रति कसरी विश्वास गर्ने ? सुशासन हुन्छ ?,” उनले प्रश्न गरे ।

प्रस्तावित प्रधानन्यायाधीश श्रेष्ठविरुद्ध उजुरी दिएका व्यक्तिहरूसित संसदीय सुनुवाइ समितिमा छलफल जारी छ ।