काठमाडौं । नेपाल धितोपत्र बोर्डले धितोपत्र दलाल (ब्रोकर) कम्पनीले हाल लिँदै आएको कमिसन परिवर्तन गर्न छलफल थालेको छ । बोर्डका कार्यकारी निर्देशक तथा प्रवक्ता मुक्तिनाथ श्रेष्ठका अनुसार अहिले ब्रोकरहरूले लिँदै आएको कमिसनमा परिमार्जन गर्ने तयारी भइरहेको छ ।

“ब्रोकर कमिसन पुनरवलोकन गर्ने भन्ने विषयमा छलफल भइरहेको छ । तर, यो नै गर्ने भन्ने निष्कर्ष निस्किएको छैन,” प्रवक्ता श्रेष्ठले भने, “नियमावलीमा परिवर्तन गर्नुपर्छ । त्यो वैज्ञानिक तरिकाले गरिने छ । समयसापेक्ष बनाइने छ । अहिले यतिमात्र बुझ्नुहोस् ।”

हाल ब्रोकरहरूले ५० हजार रुपैयाँको कारोबार गर्दा ०.४ प्रतिशत कमिसन लिँदै आएका छन् । त्यस्तै, एक करोडभन्दा माथिको कारोबारमा ०.२७ प्रतिशत कमिसन लिँदै आएका छन् । त्यस्तै, ५० हजारदेखि पाँच लाख रुपैयाँसम्मको कारोबारमा ०.३७ प्रतिशत कमिसन दिँदै आएका छन् । यसका साथै पाँच लाखदेखि २० लाखसम्म ०.३४ प्रतिशत र २० लाखदेखि एक करोड रुपैयाँसम्म ०.३ प्रतिशत कमिसन लिँदै आएका छन् ।

बोर्डले आफूसँग भएका तथ्यांकलाई केलाएर मात्र वैज्ञानिक ढंगले ब्रोकर कमिसन परिमार्जन गर्नुपर्ने स्टक ब्रोकर एसोसिसन अफ नेपालका अध्यक्ष धर्मराज सापकोटा बताउँछन् ।