काठमाडौं । सदनको गतिरोध अन्त्य गर्न सभामुख देवराज घिमिरेले दलहरूसँग छलफल गर्दै छन् । सभामुखको सचिवालयले दिएको जानकारीअनुसार अहिले केहीबेरमा छलफल सुरू हुनेछ ।

सभामुख घिमिरेले नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राष्ट्रिय प्रजातन्त्र पार्टीलगायत दलका प्रमुख सचेतकहरूसँग छलफल गर्न लागेका हुन् । छलफल सभामुखको कार्यकक्ष बानेश्वरमा हुनेछ ।

प्रतिनिधिसभा बैठक विगत चार दिनदेखि चल्न सकेको छैन । प्रधानमन्त्री पुष्पकमल दाहाल प्रचण्डले एउटा पुस्तक विमोचन कार्यक्रममा भारतको चासोमा नेपालमा सरकार बन्ने आशयको अभिव्यक्ति दिएपछि एमालेले सदन अवरोध गर्दै आएको छ ।

उक्त गतिरोध अन्त्य गर्न आजै प्रधानमन्त्री प्रचण्डसहित कांग्रेस सभापति शेरबहादुर देउवा र एमाले अध्यक्ष केपी ओलीबीच सिंहदरबारमा संवाद भएको छ । प्रधानमन्त्री प्रचण्डले सभालाई सम्बोधन गर्ने र सदन चलाउने सहमति भएको कांग्रेस प्रमुख सचेतक रमेश लेखकले जानकारी दिए ।

यही छलफलका कारण दिउँसो १ बजेका लागि बोलाइएको बैठक प्रधानमन्त्री प्रचण्डको टेलिफोनपश्चात् सभामुख घिमिरेले ३ बजेका लागि सारेका छन् ।

त्यसअघि, सभामुख घिमिरेले प्रमुख सचेकतहरूलाई बोलाएर बैठक चलाउने विषयमा छलफल गर्न लागेका हुन् ।