काठमाडौं । समयमा पानी नपर्दा देशभर धान रोपाइँमा कमी आएको छ । गत वर्षको असार १५ गतेसम्म धान रोपाइँ हुने क्षेत्रमध्ये २५ प्रतिशत रोपाइँ भएको थियो ।

तर, यो वर्षको असार १५ गतेसम्म १२ प्रतिशत क्षेत्रमा मात्र धान रोपाइँ भएको कृषि तथा पशुपन्छी विकास मन्त्रालयका प्रवक्ता प्रकाशकुमार सञ्जेलले बताए । “गत वर्षको यो अवधिमा २५ प्रतिशत धान रोपाइँ भएको थियो । यो वर्ष ढिला वर्षा सुरु भएकाले रोपाइँ १२ प्रतिशतमात्र भएको छ,” उनले भने, “अब पानी पनि पर्न थालेको छ । रोपाइँ हुने क्रम बढ्दै जान्छ ।”

प्रि–मनसुन ढिला हुँदा पनि रोपाइँ कम भएको उनको भनाइ छ । यो वर्ष मलको उपलब्धता सहज भएकाले पनि रोपाइँ नरोकिने सञ्जेलले बताए ।  उनले कृषकले उन्नत जातको धानको बिउ लगाउने क्षेत्रफल बढ्दै गएको बताए ।

यो वर्ष तराईमा सबैभन्दा कम क्षेत्रमा धान रोपाइँ भएको छ । गत वर्ष यो अवधिमा तराईमा ११ प्रतिशत धान रोपाइँ भएकोमा चालु वर्षमा तीन प्रतिशतमात्र धान रोपाइँ भएको मन्त्रालयले जानकारी दिएको छ ।  यो वर्ष सबैभन्दा बढी क्षेत्रफलमा धान रोपाइँ कर्णाली र सुदूरपश्चिम प्रदेशमा भएको छ । यी दुई प्रदेशमा २३ प्रतिशत धान रोपाइँ भएको छ । गत वर्ष सुदूरपश्चिम प्रदेशमा यो अवधिमा ४३ प्रतिशत धान रोपाइँ भएको थियो ।

मन्त्रालयका अनुसार कोसी प्रदेशमा गत वर्ष र यो वर्षको धान रोपाइँ औसत रहेको छ । गत वर्षको असार १५ गतेसम्म १८ प्रतिशत धान रोपाइँ भएको थियो । यो वर्षको सोही अवधिमा १७ प्रतिशत धान रोपाइँ भएको छ ।

वाग्मती प्रदेशमा यो वर्ष पाँच प्रतिशत मात्र धान रोपाइँ भएको छ । गत वर्ष यो प्रदेशमा ३८ प्रतिशत धान रोपाइँ भएको थियो । गण्डकी प्रदेशमा यो वर्ष सात प्रतिशत रोपाइँ भएको छ । गत वर्षको सोही अवधिमा यो प्रदेशमा ३४ प्रतिशत धान रोपाइँ भएको थियो ।

लुम्बिनी प्रदेशमा यस वर्ष ११ प्रतिशत धान रोपाइँ भएको छ । गत वर्षको सोही अवधिमा भने यो प्रदेशमा ३३ प्रतिशत धान रोपाइँ भएको थियो ।