काठमाडौं । अमेरिकाको मोन्टाना राज्यले टिकटकमाथि प्रतिबन्ध लगाएपछि कम्पनीले यो निर्णयविरुद्ध मुद्दा दायर गरेको छ । गत हप्ता मोन्टाना राज्यले चिनियाँ स्वामित्वको भिडियो सेयरिङ प्लेटफर्म टिकटकमाथि पूर्ण प्रतिबन्ध घोषणा गरेको थियो ।

त्यसविरुद्ध सोमबार टिकटकले मुद्दा दायर गरेको हो । टिकटकले यो प्रतिबन्ध अमेरिकाको स्वतन्त्र अभिव्यक्ति अधिकारसँग बाझिएको बताएको छ । मोन्टानाको जिल्ला अदालतमा सोमबार दायर गरिएको मुद्दाले गैरकानुनी प्रतिबन्धलाई उल्टाउन खोजेको छ ।

कम्पनीले एक विज्ञप्तिमा भनेको छ, “हामी हाम्रो व्यवसाय र मोन्टानाका लाखौँ टिकटक प्रयोगकर्ताहरूको रक्षा गर्न मोन्टानाको असंवैधानिक टिकटक प्रतिबन्ध गर्ने निर्णयलाई चुनौती दिइरहेका छौँ ।”

१० लाखभन्दा बढी जनसंख्या भएको मोन्टानाले गत डिसेम्बरमा सरकारी उपकरणहरूमा एपमाथि प्रतिबन्ध लगाएको थियो । गत हप्ता घोषणा गरेको पूर्ण प्रतिबन्ध सन् २०२४ को जनवरीदेखि कार्यान्वयनमा आउनेछ र टिकटक डाउनलोडका लागि उपलब्ध हुनेछैन ।

टिकटकले यसका प्रयोगकर्ताहरुको तथ्यांक चिनियाँ सरकारलाई हस्तान्तरण गर्नसक्छ भन्ने विषयलाई लिएर विश्वभर तथा विशेषतः पश्चिमा मुलुकहरुले यसविरुद्ध कडा कदम चालिरहेका छन् । तर, टिकटकले यो विषयलाई अस्वीकार गर्दै आएको छ ।