काठमाडौं । प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले स्वास्थ्यमा खराबी आएका कारण आजको संसद् बैठकमा उपस्थित हुन नसकेको बताएका छन् । नक्कली भुटानी शरणार्थी प्रकरणमा आजको संसद् बैठकमा बोल्ने बताएका ओली अनुपस्थित भएका थिए । 

ओलीले सामाजिक सञ्जालमार्फत आजको बैठकमा स्वास्थ्य प्रतिकूलताका कारण उपस्थित हुन नसकेको भन्दै आगामी बैठकमा उक्त विषयमा आफ्नो धारणा राख्ने बताए ।

उनले लेखेका छन्, “प्रतिकूल स्वास्थ्य अवस्थाका कारण आज म संसद्को बैठकमा सहभागी हुन सकिनँ । नक्कली भुटानी शरणार्थी प्रकरणबारे आफूले थाहा पाएका तथ्यहरु संसद्समक्ष राख्ने मैले यसअघि बताएको थिएँ । स्वास्थ्यमा सुधार आएपछि त्यस विषयमा संसद्मा बोल्ने नै छु ।”

उनले सदनमा हरेक महिना प्रधानमन्त्रीले सांसदहरुको प्रश्नको जवाफ दिने अभ्यासको सुरुवात हुनु ठिक भएको पनि उल्लेख गरेका छन् । 

“सम्माननीय सभामुखज्यूले प्रत्येक महिनाको पहिलो साता प्रधानमन्त्री र सांसदहरुबीच जनताका जल्दाबल्दा विषयमा सवालजवाफको नयाँ प्रचलन आजदेखि सुरु गर्नुभएको छ । ठीक  छ,” उनले लेखेका छन्, “प्रश्नहरु दुई किसिमका हुन्छन् । एकथरि प्रश्नको उत्तर मात्र दिए पुग्छ । देशको भविष्यलाई नै प्रभावित पार्ने कतिपय प्रश्नको उत्तर मात्र दिएर पुग्दैन, जनतालाई अनुभूति हुने गरी परिणाम दिनुपर्छ । सांसदहरुले संसद्मा प्रश्न गर्दा प्रत्येक नागरिकले त्यसलाई आफ्नो प्रश्न ठान्न सकोस् र प्रधानमन्त्रीले दिएको उत्तरमा विश्वास र भरोसा गर्न सकोस् । त्यसले हरेक नागरिकले संसद्मा आफैं भएको महसुस गर्न पाउने छ । प्रश्नहरु औपचारिकता मात्रै नहोउन् र उत्तरहरु ओठे प्रतिवद्धता मात्रै नहोउन् । शुभकामना छ ।