काठमाडौं । अर्थमन्त्री युवराज खतिवडाले कारोनाबाट प्रभावित अर्थतन्त्रका लागि  सरकारले बजेटमार्फत् ५५ देखि ६० अर्बको राहत प्याकेज ल्याएको दाबी गरेका छन् । बजेटपछि शुक्रबार आयोजित पत्रकार सम्मेलनमा उनले राहतको स्वरुप विभिन्न हुने भन्दै ती विभिन्न स्वरूपको माध्यमबाट करिब ६० अर्बको राहत ल्याएको बताएका हुन् । 

“प्रधानमन्त्री रोजगार कार्यक्रममार्फत् काममा लगाउने र काममा आउनेलाई २५ प्रतिशत खाद्यान्नका लागि राहत दिने सरकारको नीति रहेको र त्यसमार्फत् ३ अर्ब राहत प्याकेज आएको छ,” उनले भने, “विद्युत् महसुलमा छुट दिँदा ८ अर्ब राहत दिएका छौं, यस्तै वायुसेवा कम्पनीको हवाई इन्धनमा लगाउने कर लगायत अन्य नवीकरण दस्तुरमा छुट दिँदा करिब डेढ अर्बको अर्को राहत प्याकेज आएको छ ।” 

राहत भनेको नगद बाँड्ने मात्रै नभएको उनको भनाइ छ । उनले भने, “राहतका रूपमा कर छुट, ब्याजदरमा सहुलियत, अन्य विभिन्न जरिवाना मिनाहा पनि हुन सक्छ ।”
 
सरकारले सामाजिक सुरक्षा कोषमा रोजगारदाता र श्रमिकको लकडाउन अवधि भरको योगदान सरकाले तिर्ने भनेको र यसमा डेढ अर्ब खर्च हुने भन्दै त्यो पनि राहत नै भएको उनले बताए ।

उनले भने, “सहुलियतपूर्ण कर्जा ५ प्रतिशत व्याजमा उपलब्ध गराउने भनेको छ त्यसका लागि र उक्त कर्जाको बिमा प्रिमियमका लागि करिब १४ अर्ब छुट्याएको छ, नेपाल राष्ट्र बैंकमार्फत् १ खर्बको पुनर्कर्जा प्याकेजमार्फत् २० अर्ब ब्याज अनुदान दिने, यस्तै करिब ६ अर्ब कर छुट दिएका छौं र त्यो पनि राहत नै हो ।”

राहत प्याकेजका विभिन्न माध्यम हुने र त्यो माध्यम सरकारले प्रयोग गरिरहेको उनले बताए ।