काठमाडौं । ऊर्जा, जलस्रोत तथा सिँचाइमन्त्री दीपक खड्काले परीक्षामा सामेल नै नहुने विद्यार्थीले कति नम्बर पाउँछन् भनी प्रश्न गरेका छन् । बिहीबारको प्रतिनिधिसभा बैठकमा विद्युत प्राधिकरणका कार्यकारी निर्देशक कुलमान घिसिङलाई शून्य अंक दिइएकोबारे प्रस्टीकरण दिँदै उनले यस्तो प्रश्न गरेका हुन् ।

खड्काले कुलमानलाई ०७८ साउन २७ मा नियुक्ति गर्दा नै कार्यसम्पादनका आधारमा पुरस्कृत कि निष्कासन हुने भन्ने तोकिएको बताए । “नियुक्ति गर्दा नै हरेक वर्ष कार्यसम्पादन मूल्यांकन गर्ने, त्यसका आधारमा पुरष्कृत गर्ने कि निष्कासन गर्ने भन्ने उल्लेख भएको रहेछ,” उनले भने ।
 
उनले भदौ मसान्तभित्र कार्यसम्पादन मूल्यांकन गर्नुपर्ने व्यवस्था रहेको सुनाए । उनले भदौमा कार्यसम्पादनका लागि अनुरोध नगरेकाले मूल्यांकन नभएको उनको भनाइ छ । त्यसपछि असोजमा लिखित स्मरण गराइएको उनले सुनाए ।
 
“एकैचोटि पुसमा ल्याएर आफैँ नम्बर दिएर ९९.७८ आएको छ भनेर मन्त्रालयलाई दिनुभयो,” मन्त्री खड्काले भने । उनले विद्यार्थी जाँचमै उपस्थित नभए कति नम्बर पाउने भन्दै प्रश्न पनि गरे । 

खड्काले कानुनको पालना नगरेकाले उनलाई शून्य दिइएको बताए । नभए सांसदहरूले 'उहाँलाई कानुन लाग्दैन भनेर संविधानमा नै लेख्नू' भनी कटाक्ष गरे ।
 
“कि मलाई भनिदिनुपर् यो माननीयज्यूहरूले, कि उहाँ कानुनभन्दा माथि हुनुहुन्छ । उहाँलाई कानुन लाग्दैन । संविधानमा लेखिदिनुपर्‍यो,” उनले भने ।
 
अहिलेको व्यवस्थामा कानुनको पालना गर्ने सबैको दायित्व भएको उनको भनाइ छ । श्री ५ र श्री ३ को सरकार मात्रै कानुनभन्दा माथि रहेको उनले बताए ।
 
“उहाँ उपस्थित नै हुनुभएन, टेर्दै टेर्नुभएन । चिन्दै चिन्नुभएन,” मन्त्री खड्का भन्छन् ।