काठमाडौं । एमाले सांसद ठाकुर गैरेले निजामती विधेयकमाथि राज्यव्यवस्था समितिमा संंशोधन प्रस्ताव प्रस्तुत गरेका छन् । राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समिति (संयुक्त) समितिका सभापति समेत रहेका गैरेले निजामतीमा दण्ड सजाय र पुरस्कारका बारेमा स्पष्ट गर्नुपर्ने प्रस्ताव पनि गरेका छन् । 

‘‘राम्रो काम गर्ने पनि ‘भिक्टिम’ हुने गरेका छन् । माथि सोध्नुपर्छ, भोलि आउनुस्, कागज मिलेन भन्नेको अन्त्य गर्ने व्यवस्था गर्नुपर्छ,’’ उनले भने, ‘‘कामका लागि घुस माग्नेलाई ठाउँको ठाउँ दण्डित गर्ने व्यवस्था गर्नुपर्छ ।’’

सरुवाको अवधि तोक्नुपर्ने र कामका लागि कसैले पनि रिस्क नलिने प्रवृत्ति भएकाले त्यसको अन्त्य हुनुपर्ने उनको प्रस्ताव छ । 
 
ट्रेड युनिनमाथि निषेध गर्ने खालका कुरा आएको उल्लेख गर्दै गैरेले भने,‘‘एउटा ट्रेड युनियन हुनुपर्छ । तर, राजनीतिक आस्था निषेध गर्न पाइँदैन । मान्छेको आस्थालाई रोक्न हुँदैन । एउटा ट्रेड युनियनमा नै आस्था राख्न पाउनुपर्छ ।’'
 
सेवा अवकाशपछि राजनीति नियुक्तिका लागि दुई वर्ष ‘कुलिङ पिरियड’ हुनुपर्ने उनको प्रस्ताव छ । राजदूतलगायत पदप्रति संकेत गर्दै उनले बाहिर पठाउँदा देशप्रति समर्पित हुने सर्तसहित मात्रै २ वर्षपछि पठाउनुपर्ने उनले बताए । 

६० वर्षको उमेरहदलाई ६२ वर्षको बनाउनुपर्ने उनको प्रस्ताव छ ।