काठमाडौं । ‘म कुनै पनि न्यायिक जाँच दिन अदालती प्रक्रियाको सम्मान गर्न चाहन्छु । न्यायिक प्रक्रियामा सघाउने प्रतिबद्धता जनाउन चाहन्छु । म सम्मानित अदालतप्रति आशा राख्छु, विश्वास राख्छु ।’

राष्ट्रिय स्वतन्त्र पार्टी रास्वपा सभापति रवि लामिछाने पार्टी कार्यालयबाट प्रहरी भ्यान चढ्नुअघिका बोली हुन् ।

त्यही समयमा रविले सन्दर्भहरु जोड्दै अन्य अभिव्यक्ति पनि दिएका थिए । ‘नेपाली जनताको आशा र भरोसामाथि जुन प्रहार भएको छ यसविरुद्ध खुलेर लड्न आह्वान गर्दछु । राज्यले गरेको दादागिरीलाई डटेर सामना गर्न अपिल गर्दछु ।’

धेरैलाई लागेको थियो, अदालती प्रक्रियामा रहँदा रास्वपा नेता/कार्यकर्ता संयमित रहनेछन् । किनभने तिनले स्थापित दलका नेता/कार्यकर्ता आफ्ना नेतामाथि आरोप/अभियोग लाग्दा घेराउ वा नाराबाजी उत्रन्थे ।  रास्वपा नेता/कार्यकर्ताले तिनका प्रयोग शब्दावली थियो, ‘झोले’ । सामाजिक सन्जाल ‘झोले’ जस्ता अपमानित शब्दले रंग्याएको पृष्ठभूमि आलै छ ।

रास्वपा कार्यकर्ता तिनै पुराना दलका कार्यकर्ताभन्दा अझ ‘संस्कारहीन’ शैलीमा अघि बढेका हुन् ?

नक्कली भुटानी शरणार्थी प्रकरणमा नेपाली कांग्रेसका नेता तथा पूर्व गृहमन्त्री बालकृष्ण खाँड पक्राउ पर्दा विरोधमा भ्रातृ संगठन तरुण दलका केही नेता कार्यकर्ता सडकमा निस्किए । त्यस्तो क्रियाकलापप्रति कांग्रेसभित्रैबाट विरोध भयो ।

संसदमा कांग्रेसका नेताहरुले कारबाहीमा सहयोग गर्ने प्रतिवद्धता जनाएका थिए । पार्टीको केन्द्रीय सदस्य पदबाट निलम्बन गर्न महामन्त्रीहरुले सभापति शेरबहादुर देउवामा दबाब पारेका थिए । कांग्रेसमा खाँडलाई जोगाउनुपर्छ र उनी ‘केही करोड भ्रष्टाचारका लागि पञ्चायतसँग लडेर आएका थिएनन्’ भन्ने नेताहरु पनि नभएका होइनन् । 

उनीपछि कांग्रेस नेताहरु पूर्वसञ्चारमन्त्रीद्वय मोहनबहादुर बस्नेत र ज्ञानेन्द्रबहादुर कार्कीको नाम पनि सेक्युरिटी प्रिन्टिङ प्रेस घोटलामा नाम जोडिएको थियो । 

त्यसबेला मोहनबहादुर बस्नेत स्वास्थ्य तथा जनसंख्यामन्त्री वहाल थिए । उनको निलम्बन माग्दै संसदमा आवाज उठाउनेमध्ये पनि कांग्रेसकै सांसदहरु थिए । भलै अख्तियारले उनीहरु दुवैविरुद्ध मुद्दा चलाएन । त्यसमा के/के कुराले काम गर्‍यो भन्ने कुरा अर्को अनुसन्धानले मात्र पुष्टि गर्न सक्छ । 

यसअघि राप्रपाकी सांसद गिता बस्नेतविरुद्ध पनि रविलाई जस्तै पक्राउ पूर्जी जारी भएको थियो । आफू सदस्य नै नभएको छिपछिपे सहकारीबाट करोडौं ऋण लिएर अपचलन गरेको आरोपमा उनीविरुद्ध पक्राउ पूर्जी जारी भएको थियो । 

राप्रपाले केन्द्रीय समितिबाटै उनलाई पक्राउ गरेर अनुसन्धानका लागि आग्रह गरेको थियो । भने फरार रहेकी सांसद बस्नेतलाई पनि प्रहरीसमक्ष गएर अनुसन्धानको प्रक्रियामा सघाउन आग्रह गरेको थियो । भलै उनी अझै फरार छिन् ।  

तर, सहकारीका बचतकर्ताको रकम अपचलन आरोपमा रवि पक्राउ परेपछि सिंगो रास्वपा आन्दोलनमा छ ।  

अदालतमाथि आफ्नो आस्था र विश्वास देखाएर पक्राउ परेका लामिछानेले पहिलो पटक म्याद थपका लागि कास्की जिल्ला अदालतको इजलास पुग्नुअघि नै ओली सरकार नढल्दासम्म सडकमै रहन कार्यकर्तालाई आह्वान गरेका छन् । 

केही समय अघि कान्तिपुर मिडिया ग्रुपका अध्यक्ष कैलाश सिरोहिया पक्राउ पर्दा पनि त्यसको समर्थन र विरोधमा जनमत विभाजित भएको थियो । त्यसबेला रास्वपा र समर्थकहरुको प्रश्न थियो, ‘अदालतको आदेशमा पक्राउ पर्दा विरोध किन ? कानुन अनुसार अदालतले काम गर्छ, उसलाई अवरोध गर्ने प्रयास नहोस् ।’

अरुका हकमा एउटा आफ्ना नेताका हकमा अर्कै बोली ? सडकमा नाराबाजी उत्रिएको रास्वपा नेता/कार्यकर्तामाथि प्रश्न उब्जिएको छ । रास्वपाका कार्यकर्ताले अरुलाई ‘झोले’ लेखेको शब्द मेटिएका छैनन् । त्यसो भए मुलुकमा नयाँ ‘झोले’ जन्मिएका हुन् ? यो प्रश्न रास्वपा नेतृत्वतिर सोझिएको छ । 

पोखरा जिल्ला अदालतका न्यायाधीश कृष्णजंग शाहको इजलासले प्रहरीलाई पक्राउ अनुमति दिएपछि उनलाई काठमाडौंबाट नेपाल प्रहरीको केन्द्रीय अनुसन्धान व्युरो सीआइबीले पक्राउ गरेर पोखरा पठाएको हो । 

रविसँगै गोरखा मिडियामामा संचालक भएर राजीनमा दिएका पूर्व डिआइजी छविलाल जोशी असोज ६ गते नै पक्राउ परेका थिए । उनलाई अदालतले त्यही कसुरमा म्याद थपिदिएका कारण थुनामै रहेकै छन् । रवि पक्राउ परेका दिन उनलाई अदालतले थप २० दिनको म्याद थप गरिदिएको छ ।
 
रविको पार्टी रास्वपा स्वयंले अदालतबाट पक्राउ पूर्जी जारी भए दलले सहयोग गर्ने भनेको थियो । तर, रवि पक्राउ परिसकेपछि भने रास्वपाका गतिविधि पूर्वघोषणाविपरीत छन् । 

रास्वपामा ‘ओजनदार’ व्यक्तित्व उपसभापति डा. स्वर्णिम वाग्लेको छ । राष्ट्रसंघीय निकायमा महत्वपूर्ण पद सम्हालिसकेका विद्यावारिधी वाग्ले पनि अदालततलाई म्याद थपमै अवरोध पुग्नेगरी निषेधाज्ञा तोड्दै सडकमा छन् । सिंगो पार्टीले रवि पक्राऊविरुद्ध ७७ जिल्लामै ज्ञापनपत्र बुझाउन सर्कुलर जारी गरेको छ । यस्तै हरेक जिल्लाबाट १०० जना पोखरा आउन आन्तरिक सर्कुलर समेत जारी समाचार आइरहेका छन् । 

रास्वपाले देशभरबाट पोखरामा विरोध केन्द्रित गर्ने भएपछि आइतबार कास्की जिल्ला प्रशासनले निषेधाज्ञा जारी गर्‍यो । निषेधाज्ञा तोड्दै आइतबार पनि रास्वपाले प्रदर्शन गर्‍यो । 
रास्वपा कार्यकताले अदालत परिसर नजिक आन्दोलन केन्द्रित गरेपछि प्रहरीले पानीको फोहोरा प्रहार गरी आन्दोलन तितर–वितर भएको थियो । तर, त्यहाँबाट हटेपछि रास्वपाले रवि पक्राउविरुद्ध आन्दोलन जारी राख्यो । 

अदालतबाट पक्राउ अनुमति हुनासाथ रविले फेसबुकमा लेखेको थिए, ‘सरकार मर्‍यो, हामीलाई जुठो पर्‍यो । रास्वपाका आन्दोलनकर्ताले त्यही आसयसहित सेतो कपडाले टाउको बाँधेका थिए ।’