काठमाडौं । विश्वका सबैभन्दा धनी व्यक्ति मध्ये एक एलन मस्कले तीन महिनामा डोनाल्ड ट्रम्पको चुनावी अभियानलाई ७५ मिलियन डलर (१० अर्ब रुपैयाँभन्दा बढी) दिएका छन् ।

अमेरिकी राष्ट्रपति निर्वाचनमा रिपब्लिकन पार्टीका उमेदवार तथा पूर्वराष्ट्रपति डोनाल्ड ट्रम्पको चुनावी अभियानलाई सघाउने उद्देश्यले उनले उक्त रकम दिएका हुन् । 

अमेरिकी सरकारी अनुसन्धानबाट यो तथ्य बाहिर आएको हो । सरकारी अनुसन्धानअनुसार एलन मस्कले डोनाल्ड ट्रम्पको सहयोगी अभियान समूह अमेरिका पीएसीलाई तीन महिनामा करिब ७५ मिलियन अमेरिकी डलर दिएको पाइएको हो ।

गत जुलाईमा ट्रम्पको ज्यान लिने उद्देश्यले आक्रमण भएपछि एलन मस्कले ट्रम्पलाई औपचारिक रूपमा समर्थन गरेका थिए । त्यसअघि पनि मस्कले ट्रम्पलाई धेरै मुद्दामा समर्थन गर्दै आएका थिए ।

हालै पेन्सिलभेनियाको बटलरमा ट्रम्पको र्‍यालीमा मस्क पनि सहभागी थिए । यो त्यही ठाउँ हो जहाँ ट्रम्पमाथि आक्रमण भएको थियो ।

अमेरिकी चुनाव नोभेम्बरमा हुन लागेको छ, जहाँ वर्तमान उपराष्ट्रपति कमला ह्यारिस डेमोक्रेटिक पार्टीबाट उमेदवार छिन् ।

रिपब्लिकन पार्टीले पूर्वअमेरिकी राष्ट्रपति डोनाल्ड ट्रम्पलाई उमेदवार घोषणा गरेको छ । बीबीसी