काठमाडौं । गृहमन्त्री रमेश लेखकले मनसुनजन्य विपद् प्रभावितको पहिचान गरी सरकारलाई तत्काल नाम उपलब्ध गराउन स्थानीय तहलाई आग्रह गरेका छन् । शनिबार मन्त्रालयमा उनले स्थानीय तहले विपद् प्रभावितको नाम पहिचान गरेर पठाएको तीन दिनभित्रै अस्थायी आवास बनाउनका निम्ति रकम उपलब्ध गराइने बताएका हुन् ।

त्यसका निम्ति स्थानीय तहले चाँडै लाभग्राही पहिचान गरेर संघ सरकारलाई नाम पठाउनुपर्नेमा उनले जोड दिए । उनले अविरल वर्षासँगै देशभर बाढीपहिरोका कारण जनधनको ठूलो क्षति भएको उल्लेख गरे । सरकार गम्भीर भएर काममा लागेको उनले बताए ।

उनले विपद्बाट मृत्यु भएका व्यक्तिका परिवारलाई दुई लाख रुपैयाँ राहत दिने निर्णय गरेर सम्बन्धित जिल्लामा रकम पठाइसकेको जानकारी गराए । चाँडै घरमै गएर पीडित परिवारलाई राहत रकम दिने निर्णय भएको उनले बताए ।

उनले घाइतेको स्वास्थ्यलाभका निम्ति अस्पतालमा निःशुल्क उपचार गर्ने निर्णय गरिएको पनि जानकारी गराए । पूर्ण रूपले क्षति भएका घरका निम्ति तत्काल अस्थायी आवास बनाउन रकम निकासा गर्ने विषय अघि बढाइएको उनले बताए । न्युज एजेन्सी नेपाल