काठमाडौं । नेपाली कांग्रेसका नेता डा. शशांक कोइरालाले पार्टी नेतृत्वमा युवालाई अघि बढाउनुपर्नेमा जोड दिएका छन् । कांग्रेसका युवा अघि बढेका भन्दै उनले उनीहरूलाई नेतृत्वमा ल्याउन पार्टीले प्रोत्साहित गर्नुपर्ने बताए ।

शनिबार धुलिखेलमा बीपी कोइरालाको सालिक अनावरण कार्यक्रममा उनले युवाको मागलाई पार्टीले सम्बोधन नगरेको भन्दै असन्तुष्टि समेत व्यक्त गरे । शेरबहादुर देउवा सदाबहार पार्टी सभापति नहुने भएकाले पनि युवालाई ल्याउनुपर्ने उनको भनाइ थियो ।

बीपीले पदबाट राजीनामा दिएर कृष्णप्रसाद भट्टराई पार्टी सभापतिको जिम्मेवारी दिएको उनले उल्लेख गरे । त्यसबाट सिकेर वर्तमान नेतृत्वले पनि नयाँ पुस्तालाई जिम्मेवारी हस्तान्तरण गर्दै अघि बढ्नुपर्ने उनले बताए । उनले कांग्रेसले आफ्नै खुट्टामा उभिएर अघि बढ्नुपर्नेमा जोड दिए ।

नेता कोइरालाले कांग्रेस बलियो भएर पनि बहुमत ल्याउन नसकेको अवस्थाको अन्त्य हुने गरी काम गर्नुपर्ने बताए ।

कार्यक्रममा नेता शशांक कोइरालाको भनाइ पढ्नोस्–
६० प्रतिशत मानिसहरू ४० वर्षमुनिका छन्, तर नेताहरूले कहिल्यै पनि तिनीहरूलाई सम्बोधन गरेनन् । सबै बुढाहरूका लागि मात्रै सम्बोधन गरेँ । हामीले कहिल्यै पनि युवाहरूलाई सम्बोधन गर्न सकेनौँ । जहिले पनि मन्त्रीहरू बुढैहरू बन्छन्, युवाहरूले कहिल्यै चान्स नै पाउँदैनन् । मन्त्री मात्रै होइन, कुनै पनि ठाउँमा युवाहरूलाई प्रोत्साहन किन गर्दैनौँ हामी ? भोलिको राजनीति त उनीहरूको हातमा दिनुपर्ने हो । शेरबहादुरजी सदाबहार यहाँ पार्टी सभापति हुनु हुन्न । अब युवाहरू आउँछन्, उनीहरूलाई ठाउँ दिनुपर्‍यो । उनीहरूलाई अगाडि बढाउनुपर्‍यो । हामी त छौँ, तर कति दिन छौँ ? आज छौँ, भोलि हुँदैनौँ । त्यसैले अलि पर हामीले सोच्नुपर्‍यो । आफ्नो सन्ततिलाई दिनुपर्‍यो । बीपी कोइरालाले हेर्नुस्, उहाँले के सबै आफ्नो लागि मात्रै गर्नुभयो ? उहाँले सभापति हुँदाहुँदै राजीनामा दिएर किसुनजीलाई सभापति बनाउनुभयो, किनभने उहाँको स्वास्थ्य ठिक थिएन । बीपीको कुरा छोडौँ, उहाँका एकएक किस्सा छन्, तपाईंहरूलाई भन्ने मेरो समय छैन । तर, हामीले बीपी कोइरालालाई पुजेर मात्रै हँुदैन, उहाँको आदर्श बुझौँ । उहाँको पदचिह्नमा हिँडौँ । नेपाली कांग्रेस यत्रो बलियो शक्ति छ, मलाई छक्क लाग्छ, हाम्रो बहुमत हुँदैन । यत्रो शक्तिशाली पार्टी, यत्रो राम्रो उद्देश्य, यत्रो संघर्षपूर्ण जीवन, ७० वर्ष संघर्ष गरेर बल्ल त हामीले संविधान दियौँ । सुशील कोइरालाले संविधान बनाउनुभयो । तर, यो निरन्तर लागिराखेका छौँ । तैपनि, हामीले जहिले पनि अल्पमतमा हुने अथवा गठबन्धनको सरकार हुने । हामीले आफ्नो खुट्टामा उभिएर अरूलाई ठेगान लगाउनुपर्छ, त्यो दृष्टि राख्नुपर्‍यो । न्युज एजेन्सी नेपाल