काठमाडौं । सञ्चार तथा सूचना प्रविधि मन्त्रालयले चलचित्र विकास बोर्डको अध्यक्ष पदका लागि आवेदन माग गरेको छ । मन्त्रालयले आज सार्वजनिक सूचना जारी गर्दै अध्यक्ष पदका लागि आवेदन मागेको हो । 

योग्यता पुगेका नेपाली नागरिकले १५ दिनभित्र दरखास्त पेस गर्न सक्नेछन् । ३० वर्ष पूरा भई ६५ वर्ष ननाघेको व्यक्तिले आवेदन दिन पाउनेछन् । 

मान्यताप्राप्त शिक्षण संस्थाबाट कुनै विषयमा कम्तीमा स्नातक तह उत्तीर्ण गरी नेपाली चलचित्र उद्योगको स्थापना, विकास संरक्षण, संवर्द्धन तथा प्रवर्द्धनमा कम्तीमा दस वर्ष काम गरेको व्यक्तिले आवेदन दिन सक्नेछन् । अथवा प्रवीणता प्रमाणपत्र तह वा सो सरह उत्तीर्ण गरी नेपाली चलचित्र उद्योगमा निरन्तर कम्तीमा १० वर्ष काम गरेको हुनुपर्नेछ । 

साउन ९ गते निवर्तमान अध्यक्ष भुवन केसीको दुई वर्षे कार्यकाल सकिएपछि उक्त पद रिक्त छ ।