काठमाडौं । नेपाल प्रहरीको केन्द्रीय अनुसन्धान ब्युरो (सीआईबी)का तत्कालीन प्रहरी नायब उपरीक्षक (डीएसपी) रुगम कुँवर आफूमाथि अन्याय भएको भन्दै गृह मन्त्रालय पुगेका छन् । पूर्वन्यायाधीश डिल्लीराज आचार्य नेतृत्वको सुन तस्करी जाँचबुझ आयोगले उनलाई अनुसन्धानमा प्रभाव पारेको भन्दै विभागीय कारबाही सिफारिस गरेको थियो ।

डीएसपी कुँवरले भने आफू सुन तस्करीको अनुसन्धानमै नरहेको जिकिर गरेका छन् । आयोगले गलत सूचना र बिनाप्रमाण विभागीय कारबाही सिफारिस गरेको भन्दै उनले प्रतिवेदन पुनर्विचारको मागसहित गएको आइतबार उपप्रधान एवं गृहमन्त्री रवि लामिछानेसमक्ष निवेदन दिएका हुन् ।

आयोगले उठाएका विषयमा पुनः अनुसन्धान गर्न समेत उनले माग गरेका छन् । आयोगले कारबाही सिफारिस गरेर अन्याय गरेको भन्दै उनले निवेदन दिएको मन्त्रालयले जनाएको छ ।

गृहमन्त्रीबाहेक डीएसपी कुँवरले प्रहरी महानिरीक्षक (आईजीपी) वसन्त कुँवर र गृहसचिव एकनारायण अर्याललाई समेत निवेदनको बोधार्थ बुझाएको मन्त्राएका एक अधिकारीले बताए ।

कुँवर संगठित र जघन्य अपराध अनुसन्धानमा अब्बल मानिन्छन् । आयोगले सुन तस्करी प्रकरणका फरार आरोपित जीवन चलाउनेसँग फोन सम्पर्क देखिएपछि उनलाई कारबाही सिफारिस गरेको थियो ।

जीवनसँग फोन सम्पर्क स्वीकार गरेका कुँवरले सुन तस्करीबारे आफूलाई कुनै जानकारी नभएको निवेदनमा उल्लेख गरेका छन् । कुँवरसहित अधिकांश प्रहरी अधिकारीसँग जीवनको फोन सम्पर्क देखिएको छ । अरूलाई भने कुनै कारबाहीको सिफारिस गरिएको छैन ।

आयोगले सुन तस्करी प्रकरणको अनुसन्धानमा सीआईबीको कमजोरी ठहर गरेको छ । सीआईबीका तत्कालीन प्रमुख एवं एआईजी किरण बज्राचार्य, एसपी सञ्जय थापा, डीएसपी दुर्गा दाहाललाई समेत कारबाही सिफारिस गरिएको थियो । आयोगको सिफारिसपछि उनीहरूलाई तत्कालीन जिम्मेवारीबाट हटाइएको छ ।