काठमाडौं । सांसद अमरेशकुमार सिंहले आगामी वर्षको बजेटलाई बाहुबली विनियोजन विधेयक राख्न सुझाव दिएका छन् ।

बुधबार प्रतिनिधिसभा बैठकमा आगामी आर्थिक वर्ष २०८१/०८२ का लागि विनियोजन विधेयकको सिद्धान्त र प्राथमिकताको सम्बन्धमा छलफलमा भाग लिँदै सांसद सिंहले यस्तो सुझाव दिएका हुन् । उनले सरकारले आगामी वर्षको बजेटलाई बहुबली बजेटका रूपमा प्रस्तुत गरे हुने टिप्पणी गरे । 

उनले ठूला नेताहरूको क्षेत्रमा धेरै राखेर बजेट आउने गरेकाले बहुबली विनियोजन विधेयक राख्दा हुने बताएका हुन् । "ठूला नेताको क्षेत्र केन्द्रित दुईदेखि चार अर्ब रुपैयाँको बजेट छुट्याएर बजेट आउने गरेकाले मुलुकको विकास हुन नसकेको हो । अब सबै नेताहरूले अब देश बिग्रन नदिने अठोट गर्न आवश्यक छ," उनले भने ।

उनले सरकारले बजेट ठूला नेता भएको आधारमा भन्दा पनि आवश्यकताका आधारमा विनियोजन हुन आवश्यक रहेको उल्लेख गरे ।