काठमाडौं । काठमाडौं महानगरपालिकाले खुलारूपमा पानीपुरी, चटपटे र दुध बिक्रीमा रोक लगाउने तयारी गरेको छ । संक्रमणजन्य रोगहरूको जोखिम बढेको भन्दै महानगरले यी खाद्य पदार्थको खुला बिक्रीमा रोक लगाउने तयारी गरेको हो । 

महानगरको आइतबार बसेको बजार व्यवस्थापन तथा उपभोक्ता हित संरक्षण समितिको बैठकमा उपप्रमुख सुनिता डंगोलले बर्खायाममा खुला खाद्य पदार्थ बिक्रीमा रोक लगाउनुपर्ने बताइन् । 

“पानीपुरी, चटपटेजस्ता उपभोक्ता खानेकुरामा उपभोक्ताहरू झुम्मिने गर्नुभएको छ । यस्ता खानेकुराबाट हैजालगायत रोग छिट्टै सर्ने भएकाले निश्चित अवधिका लागि बेचबिखनमा रोक लगाउनुपर्ने हुन सक्छ,” उनले भनिन् ।

खुला दुध प्लास्टिकमा हालेर रबरले बाँधेर बेच्ने काम मापदण्डविपरीत भएकाले यसलाई तत्काल रोक लगाउनुपर्ने डंगोलको भनाइ छ । 

मासु पसल, दुध डेरी, तरकारी तथा फलफूल पसल अनुगमन गरी सचेत गराउने र सुधारको मौका दिने र सुधार नगर्नेलाई कानुनी र प्रशासनिक कारबाही गर्ने महानगरको तयारी छ । साथै कुच्चिएका, लेउ लागेका, टुटेफुटेका जारमा पानी बेच्न नपाइने महानगरले जनाएको छ ।