काठमाडौं । चिकित्सकले बिरामीलाई दिनेमध्ये एक तिहाइ एन्टिबायोटिक औषधि सिफारिस गर्ने गरेको अध्ययनले देखाएको छ । 

नेपाल स्वास्थ्य अनुसन्धान परिषद्ले सार्वजनिक गरेको अध्ययन प्रतिवेदनमा यस्तो तथ्यांक देखिएको हो । 

चिकित्सकले सिफारिस गरेका औषधिमध्ये ३८ प्रतिशत अर्थात् एक तिहाइ औषधि एन्टिबायोटिक हुने गरेको अध्ययन प्रतिवेदनमा देखिएको छ । त्यस्तै, ८५ प्रतिशत स्वास्थ्यकर्मीले एन्टिबायोटिक औषधि सिफारिस गर्दा जेनेरिक नाम उल्लेख नगरेको पनि प्रतिवेदनमा उल्लेख छ । 

यसलाई परिषद्ले एन्टिबायोटिक औषधिको जथाभावी सिफारिसको रूपमा व्याख्या गरेको छ । विश्व स्वास्थ्य संगठन (डब्लूएचओ)ले एन्टिबायोटिकलाई पहिलो नम्बरमा एक्सेस, दोस्रोमा वाच र तेस्रो रिजर्भ गरी तीनवटा समूहमा वर्गीकरण गरेको छ  । 

डब्लूएचओको मापदण्डमा एन्टिबायोटिक औषधिको समग्र प्रयोगमा ६० प्रतिशत एक्सेस गु्रपको हुनपर्छ । तर, नेपालमा भने एक्सेस गु्रपको प्रयोग ३० प्रतिशत, वाच ग्रुपको औषधिको प्रयोग ७० प्रतिशतभन्दा बढी र रिजर्भ गु्रपको औषधिको प्रयोग एक प्रतिशतभन्दा कम देखिएको परिषद्का सदस्या सचिव डा. प्रदीप ज्ञवालीले बताए । 

अध्ययनमा डाक्टर स्वास्थ्यकर्मी, बिरामी, भेटेरिनियन, पोल्ट्री फार्ममा आवद्ध कृषकहरू गरी ९ हजार ७२ जनालाई अध्ययनमा सहभागी गराइएको थियो ।