काठमाडौं । राष्ट्रिय प्रजातन्त्र पार्टीका सांसद ज्ञानेन्द्रबहादुर शाहीले सांसदले हस्पिटल र स्कुलको व्यापार गरेर अहिले समस्या निम्तिएको बताएका छन् ।

सोमबार प्रतिनिधिसभाको बैठकमा आगामी आर्थिक वर्ष २०८०/०८१ को बजेटमाथिको छलफलमा भाग लिँदै शाहीले यस्तो शिक्षा र स्वास्थ्य निःशुल्क पाउने व्यवस्था गर्नुपर्ने बताए ।

जनताले राजस्व तिरेअनुसारको सेवा नपाएको भन्दै उनले सरकारले जनतालाई आफ्नो अधिकारबाट वञ्चित गरेको बताए ।

“दक्षिण एसियामा सबैभन्दा बढी कर छ । तर, आज स्वास्थ्य उपचार नपाएर प्राइभेट अस्पतालमा जानुपर्ने बाध्यता छ । यही भएका नेताहरू अस्पताल र शिक्षाको व्यापार गर्छन्,” उनले भने, “यो व्यापार बन्द गर्ने नीति ल्याउनुहोस् । कुनै पनि सांसदले हस्पिटल र स्कुल खोल्न पाउँदैन भन्ने नीति ल्याउनुुस् न ।”

बेरुजु बढ्दै गएको भन्दै उनले यसलाई घटाउन लाग्नुपर्ने पनि बताए । बेरोजगारी बढेको भन्दै उनले यसतर्फ सरकारले ध्यान नदिएको पनि बताए । ऋण बढाको बढाइ गरेर त्यसको उपभोग नभएको पनि उनले बताए ।