काठमाडौं । नेकपा एमालेका महासचिव शंकर पोखरेलले दोस्रो विधान महाधिवेशनलाई पार्टीले राजनीतिक उत्सवको रूपमा मनाउने बताएका छन् । उनले विधान महाधिवेशनको सन्दर्भमा पार्टीको गौरवपूर्ण विगतको सम्झना गर्नुपर्ने उल्लेख गरे । 

मंगलबार पार्टी केन्द्रीय कार्यालयमा पार्टीको प्रचार विभाग र प्रेस चौतारीका पदाधिकारीहरूका संयुक्त बैठकलाई सम्बोधन गर्दै महासचिव पोखरेलले विधान महाधिवेशनले पार्टीको नीति, विधि र भविष्यको नेतृत्वका सन्दर्भमा ऐतिहासिक निर्णयहरू गर्ने बताए ।

"नेतृत्व छान्ने महाधिवेशन र नीति बनाउने महाधिवेशन एकै पटक हुँदा नीतिका कुरा ओझेलमा परे । नेतृत्वका बारेमा मात्र बहस र प्रतिस्पर्धा भए," महासचिव पोखरेलले भने, "जसले गर्दा एमालेले २०७८ सालमा प्रथम र यसपालि दोस्रोपटक विधान महाधिवेशन गर्न लागेको हो ।" 

पार्टीको विधान महाधिवेशन भदौ २० देखि २२ गतेसम्म ललितपुरको गोदावरीस्थित सनराइज हलमा हुँदै छ । महाधिवेशनका सन्दर्भमा पार्टीले बेहोरेका उतार चढाव, सरकारको नेतृत्व गर्दा हासिल गरेका उपलब्धि आदिका बारेमा व्यापक चर्चा परिचर्चा गरेको जनजनमा विधान महाधिवेशनका सन्दर्भमा चासो र जिज्ञासा जागरण गराउनुपर्ने महासचिव पोखरेलको धारणा छ । 

उनले पार्टीमा चर्चा र विवादको विषय बनाइन सुरु गरेको, पूर्वराष्ट्रपतिको सन्दर्भमा छोटो समयमा उपयुक्त तरिकाले समाधान गरिएको बताए । यस विषयलाई पार्टीभित्रबाट भन्दा पनि पार्टी बाहिरबाट उछालिएको स्पष्ट भएको उनको भनाइ छ । 

"पूर्वराष्ट्रपतिको सक्रिय राजनीतिमा आगमनको सन्दर्भ पार्टीभित्रबाट भन्दा पनि पार्टी बाहिरबाट बढी उचालिएको रहेछ भन्ने कुरा साउन ६ गते सकिएको केन्द्रीय कमिटीबाट स्पष्ट भयो," महासचिव पोखरेलले भने, "केन्द्रीय कमिटीले सर्वसम्मत रूपमा उहाँलाई सम्माननीयकै स्थानमा बस्ने निर्णय लियो । यसबाट पुष्टि हुन्छ कि पार्टीभित्रका भन्दा पनि पार्टी बाहिरकाहरू उहाँलाई सक्रिय राजनीतिमा ल्याएर विवादमा पार्न चाहन्थे ।"

पूर्वराष्ट्रपतिको पार्टी सदस्यता नवीकरण विशिष्ट प्रकारको विषय भएकोले यसका लागि विशेष निर्णय नै चाहिएको उनले स्पष्ट पारे । सदस्यता नवीकरणका विषयमा कतिपयले हल्का टिप्पणी गरेको पाइएको र यस विषयको गहिराईमा उनीहरु नपुगेको बताए । "पार्टीबाट रिसाएकाहरूलाई पनि फकाएर सदस्यता नवीकरण गरिन्छ । त्यसैले नवीकरण गर्छ भनेर स्वतस्फूर्त भन्नेको नवीकरण हुनुपर्ने हो," महासचिव पोखरेलले भने, "उहाँ विशिष्ट व्यक्तित्व हो । सम्मानित व्यक्तित्व हो । त्यसैले पार्टीले पनि विशिष्ट प्रकारले सम्मानजनक निर्णय गरेको छ ।"