काठमाडौं । अखिल नेपाल फुटबल संघ (एन्फा)को आयोजनामा हुने तय भएको लिग कम नकआउट प्रतियोगिता स्थगित भएको छ ।

एन्फाले बिहीबार क्लबहरूलाई प्राविधिक कारणले प्रतियोगिता स्थगित गर्नुपरेको जानकारी दिएको हो । एन्फाले टिम दर्ता गर्ने अन्तिम मिति वैशाख १० गतेसम्मलाई तोकेको थियो । तर, अन्तिम मितिसम्म तीन विभागीय टोली र संकटा क्लबले मात्र टिम दर्ता गराएका थिए ।

गत चैत २५ गते सातदोबाटोस्थित एन्फा मुख्यालयमा सम्पन्न बैठकले १४ शीर्ष डिभिजन क्लबको सहभागिता रहने लिग कम नक आउट प्रतियोगिता आयोजना गर्ने निर्णय गरेको थियो । प्रतियोगिता वैशाख २० गते हुने भनिएको थियो ।

प्रतियोगिताको विजेताले एएफसी च्यालेन्ज लिग २०२५/२६ का पहिलो चरणमा नेपालको प्रतिनिधित्व गर्ने बताइएको थियो । गत वर्ष लिग च्याम्पियन चर्च ब्वाइज युनाइटेडले यो प्रतियोगितामा नेपालको प्रतिनिधित्व गरेको थियो । चर्च ब्वाइज घरेलु मैदानमै भुटानको पारो एफसीसँग २–१ ले पराजित गरेको थियो ।

यसैगरी एन्फाले एएफसी क्लब लाइसेन्स प्रक्रिया समेत स्थगित गरिएको जानकारी दिएको छ । यससँगै एएफसीका क्लब प्रतियोगितामा यो वर्ष कुनै पनि नेपालको प्रतिनिधित्व रहने सम्भावना न्यून बनेको छ ।