काठमाडौं । राष्ट्रिय स्वतन्त्र पार्टी (रास्वपा)ले राज्यव्यवस्था तथा सुशासन समितिका सभापति रामहरि खतिवडा नेतृत्वको समितिले उपसभामुख इन्दिरा राना मगरमाथि निष्पक्ष छानबिन गर्न नसक्ने निस्कर्ष निकालेको छ ।

समितिमा उजुरी परिसकेपछि सभापति खतिवडाले संसद् बैठकमै उपसभामुखलाई मानव तस्कर भनेको आरोप लगाउँदै ‘अब स्वतन्त्र छानबिन कसरी हुन्छ ?’ भन्दै प्रश्न गरेको छ ।

पार्टीका कार्यबाहक प्रवक्ता मनिष झाले बाह्रखरीसँग कुरा गर्दै भने, “उपसभामुख हाम्रो दायराभित्रको विषय होइन । संसद्को निर्णय नआइ हामी कसरी निर्णय गर्न सक्छौँ ?”

उपसभामुख भएपछि रानाले पार्टीका पदबाट राजीनामा दिएकी थिइन् । उनका विषयमा संसद् र राज्य व्यवस्थाको समितिको निर्णयपछि मात्रै पार्टीभित्र छलफलको विषय बन्ने धारणा रास्वपाको छ । उपसभामुख विषयमा सार्वजनिक भएका विषयमा रास्वपाका बन्द प्रशिक्षणका बेला पनि कुरा उठेन ।

झाले छानबिन गर्ने समितिका सभापतिले पहिले नै मानव तस्कर भनेकोप्रति आपत्ति जनाउँदै अब निष्पक्ष छानबिन हुनेमा आशंका पैदा भएको बताए ।

“संसदसमक्ष उजुरी परेको छ । त्यसमा निर्णय भएको छैन,” उनले भने, “उपसभामुख हाम्रो डोमेनभन्दा बाहिर हुनुहुन्छ । उपसभामुख संवैधानिक परिषदको सदस्य हो । राज्यव्यवस्था समितिमा छलफल हुन बाँकी नै छ । उताबाट निर्णय भएपछिमात्रै हामीले निर्णय गर्न सकौँला । हामी मौन बसेका छैनौँ र अब्जर्भ गरिरहेका छौँ ।”

सभापतिले नै मानव तस्कर भनेको भन्दै उनले आपत्ति जनाए । “राज्यव्यवस्था समितिमा उजुरी परेपछि सभापतिले नै मानव तस्कर भनेर बोल्न मिल्छ ? समितिका सभापतिले नै बोलिसकेपछि अब कसरी निष्पक्ष छानबिन हुन्छ ?,” उनले भने, “अब उहाँहरुले गर्ने निर्णय पूर्वाग्रही हुँदैन र ?”