जलेश्वर । महोत्तरीको पिपरामा ट्र्याक्टर दुर्घटना हुँदा २७ जना घाइते भएका छन् । मुस्लिम समुदायको मोहरम्म पर्वका अवसरमा महोत्तरीको पिपरा गाउँपालिकामा लागेको दाहा (ताजिया) मेला हेर्न जाने क्रममा ट्र्याक्टर दुर्घटनामा परेको हो ।

जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक सन्तुलाल जैसवारका अनुसार बिहीबार अपाराह्न करिब ४ बजे जलेश्वर नगरपालिका–६ धबौली गाउँबाट ज१त८०४४ नम्बरको ट्र्याक्टर जलेश्वर नगरपालिका–९ स्थित परिकौली चौक नजिकै दुर्घटनामा परेको हो ।

चालकले तीव्र गतिमा ट्र्याक्टर कुदाउँदा अनियन्त्रित भई दुर्घटना भएको प्रहरीले जनाएको छ । घाइतेमध्ये २६ जनाको उपचार प्रादेशिक अस्पताल जलेश्वरमा भइरहेको छ । गम्भीर घाइतेलाई उपचारका लागि जनकपुर पठाइएको छ ।

प्रहरीका अनुसार घाइतेमध्ये धेरैको हातखुट्टा चोट लागेको छ । केहीको टाउको, अनुहार र शरीरको विभिन्न भागमा चोट लागेको छ । घटनापछि चालक फरार छन् । उनको खोजी भइरहेको प्रहरीले जनाएको छ । रासस