काठमाडौं । प्रहरीले अर्काको नागरिकतामा आफ्नो फोटो टाँसेर कन्सल्टेन्सी खोलेरे ठगी गर्ने कार्यमा संलग्न रहेको आरोपमा दुई जनालाई पक्राउ गरेको छ ।

पक्राउ पर्नेमा सर्लाहीको हरिवन नगरपालिका–३ का ३५ वर्षीय रामेश्वर सिंह र धनुषाको मिथिला नगरपालिका–२ का २७ वर्षीय रामसेवक सिंह रहेका छन् । उनीहरू ललितपुरको नख्खुमा बस्दै आएका थिए ।

प्रहरीका अनुसार उनीहरूले राजकुमार बजगाईंसहि ५५ जनालाई वैदेशिक रोजगारीका लागि युरोपका देशहरूमा पठाइदिने आश्वासन दिएका थिए । त्यसका लागि प्रतिव्यक्ति सात लाख रुपैयाँ लाग्ने र युरोप पुगेपछि मासिक एक लाख ५५ हजार रुपैयाँ तलब हुने गरी प्रतिष्ठित कम्पनीमा काममा लगाइदिने बताएका थिए ।

पीडितहरूबाट पटकपटक गरी ६३ लाख लाख रुपैयाँ उठाएर उनीहरू सम्पर्कविहीन भएको प्रहरीको भनाइ छ ।

के हो घटना ?

प्रहरीका अनुसार रामेश्वर सिंहले ०७४ सालमा बजाज ओभरसिसमा कर्मचारीको रूपमा काम गरेर वैदेशिक रोजगारसम्बन्धी काम सिकेका थिए ।

०७४ सालको फागुनमा उनले भेरी ओभरसिस किनेर सञ्चालन गरे । त्यतिबेला उनी २०० जनालाई तीन करोड रुपैयाँ ठगी गरेको अभियोगमा एक वर्ष ६ महिना जेल बसेर निस्किएका थिए ।

तर, उनको अपराध यात्रा रोकिएन । उनले आफ्नै ओभरसिसमा विदेश जान चाहेका तीन जनाको नागरिकताको दुरुपयोग गरे ।

प्रहरीका अनुसार उनले सञ्चालन गरेको भेरी ओभरसिसमा विदेश जान सरोज यादव, नागेन्द्र यादव र गुरुदेव यादवले नागरिकतासिहतका कागजात पेस गरेका थिए । उनीहरू तीनैजनाको नागरिकताको प्रमाण प्रत्रमा रामेश्वरले आफ्नो ज्वाइँ नाता पर्ने रामसेवक सिंहको फोटो टाँसेर विराट कन्सल्टेन्सी बिर्तामोड, गढीमाई कन्सल्टेन्सी काठमाडौं र कमलमाई कन्सल्टेन्सी दर्ता गरे ।

त्यसपछि उनले ४८ जनाबाट रोमानिया, जर्मनी, अफगानिस्तान, क्रोएसिया पठाउने आश्वासन दिएर प्रतिव्यक्ति सात लाख रुपैयाँसम्म उठाए ।

उनले सरोज यादव, नागेन्द्र यादव र गुरुदेव यादवको नाममा कुमारी बैंक, एनआईसी एसिया बैंक र कामना विकास बैंकमा खाता समेत खोलेका थिए । कारोबार भने रामसेवक सिंहबाट गर्ने गरेका थिए ।

सरोज यादव, नागेन्द्र यादव र गुरुदेव यादव धनुषामै कृषि पेसा गरिरहेका थिए । यता उनीहरूको नागरिकता विभिन्न बैंकदेखि कन्सल्टेन्सी खोल्ने काममा दुरुपयोग भइरहेको थियो । त्यसबारे उनीहरू तीनैजनालाई कुनै जानकारी थिएन ।

उनीहरूको नाममा खोलिएका कन्सल्टेन्सीबाट ठगिएपछि पीडितहरूले सरोज यादव, नागेन्द्र यादवविरुद्धमा वैदेशिक रोजगार विभागमा जाहेरी दिए । प्रहरीले उनीहरूलाई खोज्न थाल्यो ।

तर, अुनसन्धान गर्दै जाँदा रामेश्वर सिंहले आफ्नो  ज्वाइँ नाता पर्ने  राम सेवक सिंहको फोटो टाँसेर उनीहरूको नागरिकता दुरुपयोग गरेको तथ्य फेला पर्‍यो ।

रामेश्वरको अपराध यात्रा

प्रहरीका अनुसार रामेश्वर सिंहविरुद्ध २०७४ सालमा ठगी मुद्दा चलेको थियो । त्यतिबेला उनलाई एक वर्ष ६ महिना कैद भएको थियो ।

उनीविरुद्ध ०७८ सालमा पनि ठगी मुद्दा दर्ता भयो । तर, उनी फरार थिए ।

उनलाई ०७९ मा सिन्धुलीमा लागुऔषध मुद्दामा २४ दिन कैद र दुईहजार रुपैयाँ जरिवाना भएको थियो ।

प्रहरीले उनीहरू साथबाट विभिन्न व्यक्तिको नाममा काटिएको ६० लाख बराबरको २५ थान चेक र ९ वटा सिम कार्ड बरामद गरेको छ ।

उनहरूलाई प्रहरीले मंगलबार अपराह्नतिर ललितपुरबाट पक्राउ गरेको हो । थप अनुसन्धान तथा कारकाहीका लागि दुवै जनालाई प्रहरी परिसर टेकु पठाइएको छ ।

प्रहरीले उनीहरूमाथि ठगी, किर्ते जालसाजी, बैकिङ कसुरलगायतका अपराध मुद्दामा अनुसन्धान गरिरहेको छ ।