काठमाडौं । नेपाल–भारत अन्तर्राष्ट्रिय संस्कृत सम्मेलन आजबाट काठमाडौंमा सुरु भएको छ । बुधबार काठमाडौंको बूढानीलकण्ठमा सुरु भएको सम्मेलनलाई ऊर्जामन्त्री शक्तिबहादुर बस्नेतले उद्घाटन गरेका थिए ।

तीन दिनसम्म चल्ने सम्मेलनमा नेपाल र भारतका संस्कृतविद्हरूको सहभागिता छ । सम्मेलनलाई नीति अनुसन्धान प्रतिष्ठान नेपाल (नेनाप), केन्द्रीय संस्कृत विश्वविद्यालय र इन्डिया फाउन्डेसनले संयुक्तरूपमा आयोजना गरेका हुन् ।

सम्मेलनमा नेपाल र भारतका विभिन्न संस्कृत विश्वविद्यालयका उपकुलपतिहरू, संस्कृतका प्राध्यापकहरू, संस्कृतका ज्ञाता विश्लेषकको सहभागिता रहेछ । सम्मेलनमा नेपाल र भारतमा अहिले संस्कृतमा भइरहेका गतिविधिहरूको विषयमा कार्यपत्रहरूसमेत प्रस्तुत गरिनेछ ।

उद्घाटन सत्रमा ४०० भन्दा बढीको सहभागिता थियो । सम्मेलनका सत्रहरूमा दुवै देशका ४०/४० जना गरी ८० जनाको सहभागिता रहने नेपाल संस्कृति विश्वविद्यालयका सहप्राध्यापक एवं सम्मेलनका कार्यक्रम संयोजन प्रेमराज न्यौपानेले बाह्रखरीलाई जानकारी दिए ।

तस्बिरहरू : हरिशजंग क्षेत्री/बाह्रखरी