काठमाडौं । काठमाडौं जिल्ला अदालतबाट दोषी ठहर भएका सन्दीप लामिछानेले बुधबार उच्च अदालत पाटनबाट सफाइ पाए । उच्च अदालतका न्यायाधीशद्वय सुदर्शन देव भट्ट र अन्जु उप्रेती ढकालको संयुक्त इजलासले मंगलबारदेखि सुनुवाइ थालेर बुधबार फैसला सुनाएको हो ।

सन्दीपका समर्थकहरू मंगलबार पनि साँझैसम्म अदालत परिसरमा थिए । तर, इजलासले मुद्दालाई हेर्दाहेर्दैमा राखेपछि उनीहरू निराश भएर फर्किएका थिए ।

आज पनि उनीहरू उच्च अदालत परिसरमा बिहानैदेखि भेला भएका थिए । ठूलो संख्यामा सन्दीपका समर्थक भेला हुन थालेपछि सम्भावित दुर्घटनालाई लक्षित गरेर सुरक्षा व्यवस्था कडा पारिएको थियो ।

तर, बुधबार अपराह्नतिर अदालतले‍ सन्दीपको पक्षमा फैसला सुनायो । फैसला आउनबित्तिकै सन्दीपका समर्थकहरू बाजागाजासहित खुसियाली मनाउन थाले । पन्चेबाजासहित आएका उनीहरूले नाचगान गरेर खुसी साँटे ।

उनीहरूले सन्दीपको पक्षमा विभिन्न नारा पनि लगाएका थिए ।

तस्बिरमा हेर्नुहोस्

तस्बिरहरू : हरिशजंग क्षेत्री/बाह्रखरी