काठमाडौं । अन्जन विष्टले नेपालबाट सबैभन्दा धेरै गोल गर्ने खेलाडीको कीर्तिमानसँग बराबरी गरेपछि फिफा विश्वकप–२०२६ छनोटको पहिलो चरणमा नेपालले लाओससँग १–१ को बराबरी खेलेको छ ।  

बिहीबार त्रिपुरेश्वरस्थित दशरथ रंगशालामा सम्पन्न खेलमा लाओसका कप्तान बोउनफचान बोउन्कोङले गोल गर्दै पाहुना टिमलाई सुरुआती अग्रता दिलाएका थिए । 

बोउन्कोङले ३३औँ मिनेटमा गोल गर्दै लाओसलाई अग्रतामा राखेका थिए । मैदानको मध्यभागमा आयुश घलानले नेपाली मिडफिल्डरलाई उपलब्ध गराएको बल खोस्दै बोउन्कोङले रक्षक अनन्त तामाङ र मनिष डाँगीलाई बिट गर्दै गोल गरे । 

यही गोलमा लाओसले पहिलो हाफमा १–० को अग्रता बनाएको थियो । पहिलो हाफमा कुनै गतिलो आक्रमण बुन्न नसकेको नेपाल दोस्रो हाफमा भने सुरुआतदेखि नै आक्रामक बनेको थियो ।

दोस्रो हाफको सुरुआतमै अन्जनको गोलबाट नेपाल खेलमा फर्कियो । ४८औँ मिनेटमा एरिक विष्टको कर्नरमा अन्जनले हेडर गोल गर्दै नेपाललाई ११ हजार २३५ दर्शकमाझ खेलमा फर्काएका हुन् । 

यो गोलसँगै अन्जनले नेपालबाट सबैभन्दा धेरै गोल गर्ने खेलाडीको कीर्तिमानसँग बराबरी गरे । नेपालबाट १३औँ गोल गरेका अन्जनले हरि खड्का र निराजन रायमाझीको कीर्तिमानसँग बराबरी गरेका हुन् ।

खेलको इन्जुरी समयमा मुख्य रेफ्री निभोन रोबेश गामिनीसँग मैदानभित्रै पुगेर विवादमा उत्रिएपछि लाओसका मुख्य प्रशिक्षकले सोझै रातो कार्डको दर्शन गर्दै 'टेक्निकल लाइन' छोडेका थिए । 

अब छनोटको दोस्रो लेगका लागि नेपाली टिम लाओस जाने छ । छनोटको दोस्रो लेग असोज ३० गते हुने छ ।

तस्बिरहरू : सुनिल प्रधान र हरिशजंग क्षेत्री/बाह्रखरी