काठमाडौं । नेपाली कांग्रेसका सभापति एवं पूर्वप्रधानमन्त्री शेरबहादुर देउवा मंगलबार प्रतिनिधिसभाको रोस्ट्रममा उपस्थित भए । प्रधानमन्त्री पुष्पकमल दाहाल ‘प्रचण्ड’ले विश्वासको मत मागेपछिको छलफलका क्रममा सहभागी हुन उनी त्यहाँ पुगेका थिए ।
उनले वर्तमान सरकारमा कांग्रेस सहभागी नहुने गरी प्रधानमन्त्रीलाई विश्वासको मत दिने बताए । “प्रधानमन्त्री पुष्पकमल दाहाल नेतृत्वको सरकारमा सहभागी नहुने र संघीय संसद्मा प्रमुख विपक्षी दलको रूपमा भूमिका निर्वाह गर्ने निर्णय गरेको छ,” देउवाले भने ।
आफ्नो मन्तव्य सकाएर उनी आसनतर्फ फर्कंदै थिए । त्यसक्रममा पहिलो लहरको आसनमा बसेका नेकपा (एमाले)का अध्यक्ष केपी शर्मा ओलीतर्फ हात लम्काए । उनले सौहार्दपूर्ण अभिवादनका लागि हात लम्काएका थिए । ओली पनि आसनबाट उठे । मुस्कुराउँदै आफ्नो हात अघि बढाए । दुई नेताले हात मिलाए ।
त्यसपछि देउवा अघि बढे । उनी प्रधानमन्त्री प्रचण्ड बसेको आसननजिक पुगे । प्रचण्ड मुस्कुराउँदै उठे । देउवाले हात लम्काए । प्रचण्डले आदरभावसहित हात अघि बढाए । यी दुई नेताले पनि हात मिलाए । त्यसपछि देउवा आफ्नो आसनमा गएर बसेका थिए ।
नेताहरूबीचको यो सौहार्दपूर्ण अभिवादनले प्रतिनिधिसभा बैठकको माहोलमा बेग्लै रौनक छाएको थियो ।
थप तस्बिर हेर्नोस्–
