काठमाडौं । काठमाडौंबाट नजिकै पर्ने उत्कृष्ट गन्तव्यका रूपमा यतिबेला नुवाकोटको लौके झरना आन्तरिक र बाह्य पर्यटकको रोजाइमा परेको छ ।

नुवाकोटको शिवपुरी गाउँपालिका–८ र ककनी गाउँपालिका–५ को सिमानामा पर्ने सानो छहरे र ठूलो छहरे (लौके) झरना यतिबेला आन्तरिक पर्यटकहरूको घुम्ने मेलो बनेको छ ।

काठमाडौंदेखि ३२ किलोमिटरको दुरीमा रहेको लौके झरनासम्म जान पनि अहिले निकै सजिलो छ । झरनासम्म पुग्न गाउँपालिकाले व्यवस्थित बाटो बनाएको छ ।

करिब १५० फिट अग्लो स्थानबाट झर्ने झरना लौकाजस्तो आकारको भएकाले उक्त झरनालाई लौके नाम दिइएको स्थानीय बताउँछन् ।

अहिले लौके झरना हेर्न दैनिक रूपमा युवायुवतीहरूको लर्को लाग्ने गरेको छ । अरू दिनभन्दा शनिबार पर्यटकहरूको बढी लाम लाग्ने गरेको स्थानीय बताउँछन् ।

झरना हेर्न आउने आन्तरिक पर्यटकहरूका कारण स्थानीयहरूको स्थानीय उत्पादन बिक्रीवितरण हुनुका साथै व्यापार व्यवसाय बढ्दा स्थानीयको आयस्रोतको केन्द्र लौके झरना बनेको छ । लौके झरनाबाट सुन्दर गाउँहरूको दृश्य देखिनुका साथै सुन्दर हिमालका दृश्य पनि देखिन्छ ।

शनिबार सम्पादक समाज नेपालले लौके झरना गन्तव्य बनाएर ‘जलवायु परिवर्तनका प्रभावहरू न्यूनीकरणका लागि अपनाउनुपर्ने रणनीति’का सम्बन्धमा एकदिने पदयात्रा कार्यक्रम गरेको थियो । समाजले आयोजना गरेको पदयात्रामा सहभागी १२० पत्रकारले लौके झरनासम्म पदयात्रासँगै दृश्यावलोकन भ्रमण गरेका थिए ।

पत्रकारहरूलाई शिवपुरी गाउँपालिका अध्यक्ष गोविन्दप्रसाद थपलियाले स्वागत गरेका थिए ।

हेर्नुहोस् थप तस्बिरहरू