काठमाडौं । टेबल टेनिसकी एलिना महर्जनले मंगलबार सम्पन्न एनएसजेएफ पल्सर स्पोर्ट्स अवार्ड : २०७७ ‘डिकेट अफ एक्सिलेन्स’मा पिपल्स च्वाइज विधाको अवार्ड जितेकी छन् ।

एलिनाले फुटबलकी एन्जिला तुम्बापो सुब्बा, क्रिकेटका कुशल भुर्तेल, ब्याडमिन्टनका प्रिन्स दहाल र एथलेटिक्सकी सन्तोषी श्रेष्ठलाई पछि पार्दै अवार्ड जित्न सफल भएकी हुन् । 

एलिनाले ४७.८३३ प्रतिशत मत हासिल गरेकी थिइन् । त्यस्तै फुटबलकी एन्जिलाले २१.५२९, कुशल भुर्तेलले १४.६६५, प्रिन्सले ८.५७९ र सन्तोषीले ७.३९४ प्रतिशत मत पाएका थिए । 

पिपल्स च्वाइस विधाका एनएसजेएफ पल्सर स्पोर्ट्स अवार्डको फेसबुक पेजमा लाइक र ईसेवामार्फत चैत ७ गते राति १२ बजेसम्म मतदान खुला गरिएको थियो । ईसेवाबाट आउने मतको मतभार ५० प्रतिशत थियो भने फेसबुक पेजको लाइकको मतभार २५ प्रतिशत थियो । ओलम्पिकबाट मान्यता प्राप्त खेल संघका मुख्य प्रशिक्षक र नेपाल खेलकुद पत्रकार मञ्चका सदस्यले पनि मतदान गरेका थिए । दुवैले मतको मतभार समान १२.५ प्रतिशत थियो । 

त्यसबाहेक पल्सर स्पोर्ट्स अवार्डमा पारा एथलिट सम्मान, स्पेसल अवार्ड, लाइफ:टाइम एचिभमेन्ट, टिम अफ दी इयर र अन्तर्राष्ट्रिय खेल पत्रकार सम्मानको घोषणा विजेता घोषणा गरिनेछ । 

विजेता एलिनाले पल्सर मोटरसाइकल पुरस्कार जितिन् । पिपल्स च्वाइस विधाबाहेक पल्सर स्पोर्ट्स अवार्डमा दशकको उत्कृष्ट पुरुष, र महिला र प्रशिक्षक स्पर्धामा अवार्ड प्रदान गरिएको थियो । त्यस्तै पारा एथलिट सम्मान, स्पेसल अवार्ड, लाइफ:टाइम एचिभमेन्ट, टिम अफ दी इयर र अन्तर्राष्ट्रिय खेल पत्रकार सम्मानको घोषणा घोषणा गरिएको थियो । 

दशकको उत्कृष्ट पुरुष, महिला, प्रशिक्षक र पिपुल्स च्वाइस विधाका विजेताले पल्सर मोटरसाइकल पुरस्कार प्राप्त गरे भने अन्य विधाका विजेताले जनही ५० हजार रुपैयाँसहित आकर्षक गिफ्ट ह्याम्पर प्राप्त गरे ।

२०५२ साल भदौ २५ गते स्थापना भएको एनएसजेएफले २०५३ देखि अवार्ड कार्यक्रम सुरु गर्दै आएको हो ।

तस्बिरहरू : हरिशजंग क्षेत्री/बाह्रखरी