काठमाडौं । कतारका विदेशमन्त्री सेख मोहम्मद विन अब्दुलरहमान अल थानीले साउदी अरेविया र अन्य राष्ट्रले वार्तामा बस्नको लागि प्रस्तुत गरेका कुनै पनि कुरा आफु मान्न तयार नरहेको बताएका छन् ।
कतारीविदेशमन्त्री थानीले गल्फ संकट समाधानको लागि वार्तामा बस्न उपयुक्त शर्तहरु अघि सार्नको लागि सुझाएका छन् । 
इटालीको राजधानी रोममा एक पत्रकार सम्मेलनमा बोल्दै थानीले साउदी लगायतका राष्ट्रले प्रस्तुत गरेको १३ बुंदे सुची अस्वीकार गर्न लायक रहेको बताएका छन् । 
“हामीलाई विश्वास र थाहा छ कि यो संसार अल्टिमेटममा चलेको छैन । हामीलाई विश्वास छ कि यो संसार अन्तर्राष्ट्रिय कानुन अनुसार चलेको छ, एउटा नियममा चलेको छ जस अनुसार कुनै ठुला राष्ट्रले साना राष्ट्रलाई हेप्न दिँदैन”, कतारी विदेशमन्त्री थानीले बताए ।
साउदी सहितका गठबन्धनले कतारलाई अल जजिरा टेलिभिजन बन्द गर्नुपर्ने सहितका १३ बुंदे सर्त पुरा गर्नको लागि १० दिनको अल्टिमेटम दिएको थियो । कतारी विदेशमन्त्री थानीले दिइएको अल्टिमेटम सकिन ४८ घण्टा बाँकी रहँदा आफ्नो धारणा व्यक्त गरेका हुन् ।
थानीले आफुहरु प्रस्तुत गरिएको सर्त अस्वीकार गरेपछि हुन सक्ने सम्भावित सैन्य वा अन्य कारबाहीको जवाफ दिनलाई तयार रहेको पनि बताएका छन् ।