काठमाडौं । मेलम्ची खानेपानीको पाइप फुटेको थापाथलीको सडकमा फसेको काठमाडौं महानगरपालिकाको नगरप्रहरी बलको गाडी निकालिएको छ । 

सडक भासिँदा फिल्ड अनुगमनमा हिँडेको नगरप्रहरी बलको बा०१ग ४०६६ नम्बरको गाडी फसेको थियो । आज बिहान पनि सो ठाउँमा अन्य गाडी फसेका थिए । 
 
गत फागुन २० गते मंगबार बिहान करिब ५ः२० बजे मेलम्चीको थोक वितरणतर्फको पाइप फुटेको सडक जलमग्न भएको थियो । 

त्यसपछि काठमाडौं उपत्यका खानेपानी लिमिटेड (केयूकेएल)को टोलीले सडक खनेर पाइप मर्मत गरेको थियो । केयूकेएलको टोलीले बुधबार एक ट्रक गिट्टी हालेर छोडेको थियो । 

नगरप्रहरी बलको गाडी फसेका कारण सो सडक झन्डै एक घण्टा अवरुद्ध भएको थियो । उक्त गाडी तान्नका निम्ति अर्को गाडीको मगाइए पनि उक्त गाडीले पनि फसेको गाडी तान्न सकेन । पछि झन्डै एक दर्जन नगरप्रहरीहरूले अगाडिबाट धकेलेपछि फसेको गाडी निस्किएको छ ।