काठमाडौं । अघिल्ला वर्ष झैं चालु आर्थिक वर्षमा पनि सरकार मूल्यवृद्धि नियन्त्रण गर्न विफल भएको छ । 

चालु आवको ११ महिनामा उपभोक्ता मुद्रास्फीति बढेर दुई अंक नजिक पुगेको छ । चालु आवमा सरकारले मूल्यवृद्धि साढे ८ प्रतिशतमा सिमित गर्ने लक्ष्य लिएकोमा बढेर ९.९ प्रतिशत पुगेको नेपाल राष्ट्र बैंकको तथ्यांकले देखाएको छ । नेपाल–भारत सीमानाकामा भएको ६ महिना लामो अवरोधले गर्दा आपूर्ति व्यवस्था असन्तुलन हुन गई मूल्यवृद्धि नियन्त्रण बाहिर गएको राष्ट्र बैंकको भनाइ छ ।

बढ्दो आयात र स्वदेशमा उत्पादन घट्दै गएको र आपूर्ति व्यवस्थापनमा असहज, यातायातमा सिण्डिकेट र व्यवसायीको मिलेमतोमा मूल्य निर्धारण (कार्टेलिङ) ले गर्दा मूल्यवृद्धि नियन्त्रण बाहिर गएको हो । सरकारले हालसम्म लिएका कुनै पनि मूल्यवृद्धिका लक्ष्य पूरा भएका छैनन् ।   

अघिलो वर्ष उपभोक्ता मूल्य वृद्धिदर ७.२ प्रतिशत थियो । यो वर्षको जेठमा मूल्य वृद्धि आकासिएर ११.१ प्रतिशत पुगेको छ । यस्तै माघमा १२ प्रतिशत नाघेको थियो । यसअवधिमा खाद्य तथा पेय पदार्थको मूल्यवृद्धि दर ११.९ प्रतिशत र गैरखाद्य तथा सेवा समूहको मूल्यवृद्धि दर १०.५ प्रतिशत रहेको राष्ट्र बैंकले जनाएको छ । आगामी आवमा मूल्यवृद्धि दर ७.५ प्रतिशतमा सीमित गर्ने सरकारले लक्ष्य लिएको छ । हालको अवस्था हेर्दा यो सीमामा मूल्य वृद्धिदर रहने अवस्था देखिन्दैन् ।  

 

राष्ट्र बैंकका अनुसार गत साउनमा ६.९ भदौमा ७.२, असोजमा ८.२, कात्तिकमा १०.४ मंसिरमा ११.६, पुसमा १२.१, माघमा ११.३, फागुनमा १०.२,चैतमा ९.७, वैशाखमा १० प्रतिशतका दरले उपभोक्ता मुद्रास्फीति बढेको छ ।