काडमाडौं । यसअघि सरकारसँग भएका सहमति कार्यान्वयनको माग राखि नेकपा माओवादी केन्द्रको केन्द्रीय कार्यालय पेरिस डाँडा कब्जा गरेका बहिर्गमित लडाकुलाई प्रहरीले एकाबिहानै पक्राउ गरी नेपाल पुलिस क्लब लगेको छ ।

सेना समायोजन प्रक्रियामा ‘अयोग्य’ भइ बहिर्गमित हुन पुगेका चार हजार ९ लडाकुले सरकारको नेतृत्व गरेको नेकपा माओवादी केन्द्रको मुख्यालय पेरिसडाँडा कब्जामा लिइ आन्दोलन गरिरहेका थिए ।

सोमबार मध्याह्नबाट पार्टी कार्यालयमा भित्रबाट ताला लगाइ बसेका उनीहरूलाई मंगलबार बिहानै प्रहरीले पक्राउ गरेको बहिर्गमित लडाकु संघर्ष समितिका महासचिव राजन मगरले जानकारी दिए । “सरकारको ठाडो निर्देशनमा एकाबिहानै हामीलाई प्रहरीले पक्राउ गर्यो । शान्तिपूर्ण तवरबाट हाम्रो माग राख्न पाउने नैसर्गिक अधिकारलाई प्रहरीले बुटले कुल्चिएको छ । पार्टी नेतृत्वले हामीलाई प्रहरी लगाएर लखेट्यो यसमा हामी निन्दा गर्न चाहन्छौँ,” उनले बाह्रखरीसँग भने ।

काखे बालकसहित आन्दोलनमा लागेका पूर्वलडाकु महिलाहरूलाई पनि प्रहरीले लछार–पछार पार्दै नियन्त्रणमा लिइ पार्टी कार्यालय खाली गराएको उनले जानकारी दिए । नेपाल पुलिस क्लबमा बालबच्चाको रुवावासी भइरहेको मगरले जानकारी दिए । माग पूरा नहोउञ्जेल आन्दोलन नछाड्ने मगरको भनाइ थियो ।

“अहिले मेचिदेखि महाकालीका बहिर्गमित साथीहरू गाडी रिजर्भ गरी आउँदै हुनुहुन्छ, यो हाम्रो निर्णायक लडाइँ हो, पछि हट्दैनौँ,” मगरले पुलिस क्लबबाट फोनमा भने ।