देश
काठमाडौं । राजतन्त्रको अन्त्य भएपछि पूर्वराजा ज्ञानेन्द्र शाह नारायणहिटी दरबार छोडेर नागार्जुन दरबार गए । तर, आफूले लगाउने श्रीपेच भने सँगै लैजान पाएनन् । पूर्वराजाहरूले विशेष अवसरमा लगाउने श्रीपेच अहिले नारायणहिटी दरबारमै राखिएको छ ।
संग्रहालयमा परिणत गरिएको नारायणहिटी दरबार अवलोकन गर्न सयौं अवलोकनकर्ता पुग्ने गर्छन् । यीमध्ये धेरैको चासोको विषय हुने गर्छ श्रीपेच । तर, संग्रहालयमा श्रीपेच सबैको पहुँचमा छैन । श्रीपेच हेर्न पाऊँ भन्दै दैनिक रूपमा संग्रहालयमा राखिएको सुझाव पेटिकामा निवेदन आउने गरेका छन् । अहिलेसम्म करिब ५ सयवटा यस्ता निवेदन आएको संग्रहालय व्यवस्थापन कार्यालयले जनाएको छ । “दैनिक रूपमा यस्ता निवेदन आइरहेका हुन्छन्,” संग्रहालयका प्रमुख रोहितकुमार ढुंगानाले बाह्रखरीसँग भने । भ्रमणकर्ताले कर्मचारीसँग पनि श्रीपेचबारे चासो राख्ने गरेको उनले बताए ।
सरकारले ०६८ सालदेखि नै सार्वजनिक अवलोकनका लागि संग्रहालयमा श्रीपेच राख्ने निर्णय गरे पनि सुरक्षाका कारण भन्दै अहिलेसम्म राखिएको छैन । “‘संग्रहालयमा श्रीपेच राख्न त्यति सजिलो छैन । एकदमै कडा सुरक्षाका साथ राख्नुपर्छ । अझै सुरक्षा व्यवस्था बलियो बनाउन सकिएको छैन,” उनले भने ।
गणतन्त्र घोषणा भएसँगै ०६५ सालदेखि नारायणहिटी दरबार संग्रहालयका रूपमा जनताका लागि खुला गरिएको थियो । स्वदेशी तथा विदेशी गरी अहिलेसम्म २१ लाख ६ हजार ७३ जनाले संग्रहालयको अवलोकन गरिसकेका छन् ।
अहिले श्रीपेच कहाँ र कसरी राखिएको छ भनेर संग्रहालय व्यवस्थापनले केही बताएको छैन । सुरक्षालाई मध्यनजर गरेर श्रीपेच सेनाको जिम्मामा सुरक्षित स्थानमा राखिएको संग्रहालय प्रमुख ढुंगानाले बताए । सरकारले श्रीपेच संरक्षणका लागि भन्दै ५ सदस्यीय समितिसमेत गठन गरेको थियो । समितिले मात्रै श्रीपेच राखिएको कोठा खोल्ने अनुमति पाएको छ ।
प्रकाशित मिति: बिहीबार, असार ३०, २०७३ १०:५८
प्रतिक्रिया दिनुहोस्