काठमाडौं । नयाँ शक्ति नेपालले नयाँ सरकार कागलाई बेल पाक्यो हर्ष न विस्मात भएको टिप्पणी गरेको छ । अस्थिरताको यो अवस्था नयाँ संविधानमा अवलम्बन गरिएको असफलसिद्ध संसदीय प्रणालीको ताजा परिणाम भएको पनि उसले जनाएको छ । 

 

नया शक्तिले बुधबार जारी गरेको प्रेश विज्ञप्तिमा उल्लेख गरिएको छ, “संविधानको कार्यान्वयनका लागि मधेस, थारु, जनजातिलगायतका मागहरुको सम्बोधन गर्न नसक्नु, भूकम्पपीडितहरूप्रति संवेदनहिनता प्रदर्शन गर्नु, कालाबजारी, महंगी र अभावलाई नियन्त्रण गर्न नसक्नु र भूराजनीतिक अवस्थितिका आधारमा अन्तराष्ट्रिय सम्बन्धमा सन्तुलन कायम गर्न नसक्नु जस्ता कारणले सरकार आफैँमा असफल छँदै थियो, त्यसमाथि सत्तारुढ गठबन्धनभित्रै बेमेल बढ्नुको परिणाम ओली सरकार संकटमा पर्नु र कांग्रेस माओवादी गठबन्धनको सरकार बन्ने अवस्था देखिएको छ ।”

 

नयाँ शक्तिले अब मुद्दाकेन्द्रित गठबन्धनभन्दा पनि कुर्सीकेन्द्रित गठबन्धन बन्ने र भत्कने प्रक्रियामा गुज्रेका कारण आम जनताका निम्ति यो परिघटना कागलाई बेल पाक्यो हर्ष न विस्मातबाहेक केही भएको बताएको हो । “जतिसुकै नयाँ गठबन्धन बने पनि जनताका सरोकार समाधान हुने परपर्दो आधार देखाउन सकेका छैनन्,” उसले विज्ञप्तिमा जोड दिएको छ । 

 

“राजनीतिक संक्रमणको यो गम्भीर मोडमा नेपाली राजनीतिको स्थायित्व र लामो संघर्षबाट प्राप्त राजनीतिक उपलब्धिको रक्षा, संविधानको स्वीकार्यतासहित जनताका पक्षमा संविधानको प्रभावकारी कार्यान्वयन, भूकम्पपछिको पुनर्निर्माण र जनताले भोगेका दैनिक जीवनका समस्याको समाधानको दिशामा केन्द्रित हुन सम्बन्धित पक्ष सरोकारवाला र आम जनसमुदायमा नयाँ शक्ति नेपाल हार्दिक अपिल गर्दछ” प्रवक्त खिमलाल देवकोटाद्वार हस्ताक्षरित विज्ञप्तिमा उल्लेख छ ।