देश
काठमाडौं । ट्राफिक प्रहरीले यात्रुसँग अभद्र व्यवहार गर्ने चालक तथा सहचालकका लागि पनि सचेतना कक्षा चलाउने तयारी थालेको छ । विशेषगरी माइक्रो बसका चालक तथा सहचालकले यात्रु र अन्य सवारीचालकलाई अभद्र व्यवहार गरेको गुनासो बढेपछि प्रहरीले सचेतना कक्षा चलाउन लागेको हो ।
माइक्रोका चालकले सडकमा दिएको हैरानीबारे ट्राफिक महाशाखा र ट्राफिक पोस्टमा दैनिक दर्जनभन्दा बढी युवतीले गुनासो गर्ने गरेका छन् । “केटी जिस्क्याउने चालकको पहिचान गर्न गाह्रो हुन्छ । त्यसैले उनीहरूलाई सम्झाएर पठाउने गरेका छौं । अबचाहिँ चालकहरूका लागि सचेतना कक्षा चलाउने तयारीमा छौं,” महानगरीय ट्राफिक प्रहरी प्रमुख डीआईजी प्रकाश अर्यालले भने । अर्यालका अनुसार सडक किनारमा पैदल हिँड्ने बटुवा र स्कुटरमा सवार युवती माइक्रोका चालक तथा सहचालकको निशानामा पर्ने गरेका छन् । “चालकको बानी सुधार्न हामीले सडकमा धेरै संघर्ष ग¥यौं तर सकिएन । अब कक्षा नै चलाउनुपर्ने भयो,” अर्यालले भने ।
ट्राफिक प्रहरीले ठाउँ अभावका कारण यात्रुसँग अभद्र व्यवहार गर्ने चालकका लागि सचेतना कक्षा चलाउन सकेको थिएन । मादक पदार्थ सेवन गरेर सवारी चलाउने तथा लेन मिच्ने चालकले भने सचेतना कक्षामा भाग लिनुपर्छ । “अब महाशाखा परिसरमै भेला पारी सबैलाई चेतनाको पाठ पढाउने तयारीमा जुटेका छौं,” डीआईजी अर्यालले भने । पहिलो चरणमा राजधानीका सडकमा चल्ने सबै माइक्रो बसका चालक र सहचालकका लागि सचेतना कक्षा चलाउने ट्राफिक प्रहरीले जनाएको छ ।
प्रकाशित मिति: बुधबार, असार २९, २०७३ ११:३२
प्रतिक्रिया दिनुहोस्