खेल
पेरिस । १५ औँ संस्करणको युरोपियन च्याम्पियनसिप (युरो–कप) फुटबल गएरातिबाट सकिएको छ । गएराती सम्पन्न फाइनलमा आयोजक फ्रान्सलाई पराजित गर्दै पोर्चुगलले यस पटकको युरो–कपको उपाधि जितेको छ ।
स्टेड डी फ्रान्स रंगशालामा इडरले अतिरिक्त समयमा निर्णायक एक गोल गरेपछि पोर्चुगलले फ्रान्सलाई १–० ले पराजित गर्दै पहिलोपटक उपाधि जितेको हो ।
यता, तेस्रो पटक युरो–कपको उपाधि जित्ने फ्रान्सको सपना भने अधुरो रह्यो । त्यस्तै पोर्चुगलले फ्रान्सबिरुद्ध लगातार १० खेलको हारको शृंखलामा समेत पूर्णविराम लगायो ।
एक महिना चलेको युरो–कप उपाधि ट्रफीसँगै पोर्चुगलले ८० लाख पाउन्ड (९४ करोड ८ लाख २६ हजार) प्राप्त गर्यो । उपविजेतामा सिमित फ्रान्सले ५० लाख पाउन्ड (५८ करोड ८० लाख १७ हजार) प्राप्त गर्यो । यसपटक युरो–कपमा २४ टोलीको सहभागिता रहेको थियो । जुन प्रयोगलाई युरोपियन फुटबल एसोसिएसन (यूएफा) ले सफल भएको बताइसकेको छ ।
यसैबीच एक महिना चलेको युरोकपबाट केही नयाँ खेलाडीको उदय भएको छ भने केही चर्चित स्टारहरु भने फ्लप भए । यसपटकको युरो–कपमा केही नयाँ रेकर्डहरु समेत कायम भए । पोर्चुगलका क्रिष्टियानो रोनाल्डो यसपटक लगातार चार सस्करणको युरो–कपमा खेल्दै गोल गर्ने खेलाडी बने । रोनाल्डोले मिचेल प्लाटिनीले युरो–कपमा बनाएको ९ गोलको किर्तिमानी बराबर गरे ।
हंगेरीका महान गोलकिपर गाबर किरलीले सबैभन्दा पाको खेलाडीको किर्तिमान बनाए । गाबरले ४० वर्षमा युरो–कप खेल्दै जर्मनीका लोथार म्याथ्युजको नाममा रहेको ३९ वर्ष ९१ दिनको किर्तिमानी भङ्ग गरे । यस्तै इंगलिस टोलीका १८ वर्षीय मार्कुस राष्फोर्ड सबैभन्दा युवा खेलाडी बने ।
गोल्डेन बुट–ग्रीजम्यान
फ्रान्स युरो–कपमा घरेलु टोलीका एन्टोनी ग्रिजम्यानले युरो–कप २०१६ को गोल्डेन बुट प्राप्त गरे । प्रतियोगितामा ६ गोल गरेका ग्रिजम्यानले सर्वाधिक गोलकर्ता बन्दै गोल्डेन बुट पाएका हुन् ।
गोल्डेन बुट जित्ने क्रममा ग्रिजम्यानले पोर्चुगलका कप्तान क्रिष्टियानो रोनाल्डो तथा फ्रान्सकै ओलिभर जिरुड लगायतलाई पछि पारे । रोनाल्डो र जिरुडले समान ३–३ गोल गरेका थिए । स्पेनिस क्लब एथ्लेटिको मड्रिडका फरवार्ड ग्रिजम्यानले समूह चरणमा अल्बानियासँगको खेलमा एक गोल गरेका थिए । अन्तिम १६ मा रिपब्लिक अफ आयरल्याण्डसँगको खेलमा उनले दुई गोल गरेका थिए । यस्तै क्वाटरफाइनलमा आइसल्याण्ड विरुद्ध १ गोल गरेका ग्रिजम्यानले सेमिफाइनलमा जर्मनी विरुद्ध पनि दुई गोल गरेका थिए ।
युवा खेलाडी–रेनाटो सान्चेज
यसपटकको युरोमा सबैको नजरमा परेका खेलाडी हुन् पोर्चुगलका–रेनाटो सान्चेज । र, आगामी सिजन जर्मन क्लब वायर्न म्युनिखबाट खेल्ने सान्चेज फ्रान्स युरोमा युवा खेलाडी घोषित भए ।
सन् १९९४ को जनवरी १ पछि जन्मिएका सबै खेलाडीलाई पछि पार्दै सान्चेजले योङ प्लेयर अफ अवार्ड हात पारेका हुन् । यूएफाको प्राविधिक अनुगमनकर्ताले पोर्चुगलका सान्चेजलाई युवा खेलाडीको रुपमा चयन गरेका हुन् । युएफाका प्राविधिक अधिकृत लोएन लुपेस्कु तथा सर एलेक्स फोर्गुसन र एलन जिरेस रहेको टोलीले सान्चेजलाई चुनेको हो । १८ वर्ष तीन सय २८ दिनका सान्चेजले पोल्याण्डसँगको क्वाटरफाइनलमा सुन्दर गोल गरेका थिए । जुन गोलले पोर्चुगल हारबाट जोगिदै सेमिफाइनलमा पुगेको थियो ।
यस्तै मिडफिल्डर सान्चेज युरो–कपको फाइनल खेल्ने अहिलेसम्मकै युवा खेलाडीसमेत चुनिए । सान्चेजले पोर्चुगलकै कप्तान क्रिष्टियानो रोनाल्डोले १२ वर्ष अघि बनाएको कीर्तिमान भंग गरेका हुन् । फाइनल खेल्दा उनी १८ वर्ष तीन सय २८ दिनका थिए । रोनाल्डो १२ वर्षअघि सन् २००४ को युरो–कपको फाइनल खेल्दा १९ वर्ष एक सय ५० दिनका थिए । उनी युरो–कप जित्ने सबैभन्दा कम उमेरका खेलाडी पनि भएका छन् । एजेन्सी
प्रकाशित मिति: सोमबार, असार २७, २०७३ ११:४५
प्रतिक्रिया दिनुहोस्