काठमाडौं । चार बँुदे माग राख्दै आमरण अनशनमा बसेका डा. गोविन्द केसीको पक्षमा समर्थन जुट्दै गएको छ । आइतबार राति अबेरदेखि सोमबार बिहानसम्ममा ६ सयभन्दा बढी शुभेच्छुक डा. केसीलाई भेट्न अस्पताल पुगेका छन् । अख्तियारको निर्देशनमा अस्पताल प्रशासनले केसीलाई अनशन बस्न नदिन सबै कोठाहरू बन्द गराएपछि उनी साँघुरो कोठामा बसेका छन् । 

 

समर्थक र शुभेच्छुकसमेत बस्न नमिल्ने कोठा भए पनि केसीलाई भेट्न जानेको संख्या बढ्दै गएको छ । अख्तियारको दबाबका बीच पनि आवासीय चिकित्सकहरूले केसीको पक्षमा विज्ञप्ति जारी गरेका छन् । अनशनको दोस्रो दिनमा नै उनीहरूले समर्थन जनाएका हुन् ।

 

नेसनल रेजिटेन्ट डाक्टर एसोसिएसनका तर्फबाट सोमबार जारी विज्ञप्तिमा केसीको माग तत्काल पूरा गर्न सरकारसँग आग्रह गरिएको छ ।

 

यता, केसीको अनशन बिथोल्ने प्रयासमा रहेको समूह भने त्यहाँबाट बाहिरिएको छ ।

 

आइतबार बेलुकासम्म ‘अस्पताल परिसरमा अनशन बस्न पाइँदैन’ भन्दै नाराबाजी गर्नेहरू बेलुका नै फर्किएका थिए ।